Չեմ կարծում, որ գնաճն ընդվզման թեմա է դառնալու, եթե օբյեկտիվ է. «Իմ քայլի» պատգամավոր Աննա Կարապետյան. ՏԵՍԱՆՅՈՒԹ

Factor.am-ի հարցազրույցն ԱԺ «Իմ քայլը» խմբակցության պատգամավոր Աննա Կարապետյանի հետ

– Տիկի՛ն Կարապետյան, ի՞նչ նախաձեռնություններով եք պատրաստվում հանդես գալ, որոնք միտված կլինեն հասարակական հնչեղություն ունեցող խնդիրների լուծմանը:

– Չեմ կարող ասել, որ իմ կողմից ներկայացվող նախագծերը հասարակական հնչեղություն են ներկայացնում: Ես դեռևս չէի ցանկանա այդ մասին բարձրաձայնել, երբ նախագծերը կդրվեն շրջանառության մեջ, այդ ժամանակ դրանց մասին կխոսեմ: Հույս ունեմ, որ դա շատ շուտով է լինելու:

– Դրանք ի՞նչ ոլորտներ են ներառում:

– Արդարադատության ոլորտն է: Այն, ինչ մտնում է պետաիրավական հանձնաժողովի ոլորտի մեջ:

– Տիկի՛ն Կարապետյան, այս ընթացքում պասիվ եք՝ հարցուպատասխաններին չեք մասնակցում, ելույթներ չեք ունենում: Սա ինչո՞վ է պայմանավորված:

– Չէի ասի, որ պասիվ եմ: Ես շատ ակտիվ աշխատում եմ: Ես հարցեր հնչեցնում եմ, իսկ այն հարցերը, որոնք ինձ համար պարզ են, չեմ հնչեցնում: Ելույթների առումով էլ, երբ նպատակահարմար կգտնեմ, այդ ժամանակ էլ ելույթ կունենամ:

– Դուք համարվում եք ԱԺ նախագահ Արարատ Միրզոյանի թիմակիցը, քանի որ եղել եք նրա աշխատակազմի ղեկավարը, երբ նա առաջին փոխվարչապետ էր: Մամուլի հրապարակումների համաձայն էլ՝ Դուք ԱԺ-ում որոշում կայացնողներից եք: Սա ինչպե՞ս կմեկնաբանեք:

– Ի՞նչ նկատի ունեք՝ ԱԺ-ում որոշում կայացնել ասելով:

– Մամուլի հրապարակումների համաձայն՝ ԱԺ աշխատակազմին, աշխատակազմի ղեկավարին վերաբերող հարցերում Դուք ևս որոշում եք կայացնում:

– Մամուլն ամեն ինչ գրում է, Դուք կարծում եք, որ ես պետք է ամեն ինչ մեկնաբանե՞մ: Նման բան չկա: Թույլ տվեք ես ժպիտով պատասխանեմ այդ հարցին:

– Իշխանությունները հայտարարում են տնտեսական հեղափոխության մասին, իսկ արտախորհրդարանական ուժերը՝ սոցիալական խնդիրների պատճառով առաջացող ընդվզման: Ինչ եք կարծում՝ սոցիալական բունտ կլինի՞:

– Դուք հիմա ուզում եք, որ ես գուշակություններով զբաղվեմ: Արտախորհրդարանական ուժերն ամեն ինչ ասում են, բայց ես կարծում եմ, որ սոցիալական ընդվզում չի լինի: Ամեն ինչ վերահսկվում է, և մենք շարժվում ենք ճիշտ ուղիով:

– Տնտեսական զարգացման և ներդրումների նախարարը գնաճի մասին է խոսել: Սա նախադրյալ չէ՞:

– Ո՛չ: Եթե գնաճը պայմանավորված է օբյեկտիվ գործոններով, չեմ կարծում, որ դա ընդվզման թեմա է դառնալու:

Մանրամասները՝ տեսանյութում:

Նարեկ Կիրակոսյան