ԵՄ պատժամիջոցների ցանկում ներառված Վրաստանի նավթավերամշակման գործարանը կդադարեցնի ռուսական նավթի գնումները

Վրաստանի Կուլևիի նավահանգստում գտնվող նավթավերամշակման գործարանի սեփականատեր Black Sea Petroleum LLC (BSP) ընկերությունն այս տարվա օգոստոս-սեպտեմբերից կանցնի Ղազախստանից և Լիբիայից նավթի վերամշակման՝ դադարեցնելով ռուսական նավթի գնումները, ասվում է BSP-ի մամուլի հաղորդագրությունում։

Եվրամիությունը Կուլևիի նավթավերամշակման գործարանը ներառել է պատժամիջոցների ցանկում՝ 21-րդ փաթեթի շրջանակում, մինչև 2027 թվականի հունվարի 25-ը ժամանակ տալով ռուսական նավթի գնումները դադարեցնելու համար։

BSP-ն հայտնել է, որ Կուլևիի նավթավերամշակման գործարանը սկսել է ղազախական նավթի վերամշակումը հուլիսի սկզբին, իսկ այս ամիս կսկսի լիբիական նավթի վերամշակումը։ Լիբիական նավթի խմբաքանակը նախատեսվում է Կուլևի հասցնել օգոստոսի 20-ից 30-ը։ Լիբիական կողմի հետ նավթի մատակարարման պայմանագիրը ստորագրվել է հուլիսի 3-ին և ուժի մեջ է մինչև 2027 թվականի վերջը՝ երկարաձգման հնարավորությամբ, հավելել է BSP-ն։

2025 թվականի հոկտեմբերին Ռուսաստանն առաջին անգամ նավթ է մատակարարել Վրաստան՝ Կուլևիի նոր նավթավերամշակման գործարան, որի տարեկան հզորությունը 1,2 միլիոն տոննա է։

Կուլևիի նավթավերամշակման գործարանը դարձել է Վրաստանի առաջին լիարժեք ցիկլի ձեռնարկությունը, ինչը թույլ կտա երկրին նվազեցնել կախվածությունը ներմուծվող նավթամթերքից, որոնք գնվում են Թուրքիայից, Ադրբեջանից, Ռումինիայից, Ռուսաստանից և Ղազախստանից։

Ընկերությունը նախատեսում է հզորությունը հասցնել 4 միլիոն տոննայի մինչև 2028 թվականը։ Նավթամթերքը կմատակարարվի ինչպես Վրաստանի ներքին շուկա, այնպես էլ կնախատեսվի արտահանման համար։

Թարգմանությունը՝ Էմմա Չոբանյանի