Նաիրի Հունանյանն ուսումնասիրվել է որպես գործակալի թեկնածու, որպեսզի օգտագործվի տարածաշրջանի երկրներից մեկի հատուկ ծառայությունների դեմ․ Ջհանգիրյան

Նախկին զինդատախազ Գագիկ Ջհանգիրյանը, անդրադառնալով Հոկտեմբերի 27-ի գործով դատապարտված Նաիրի Հունանյանի՝ ԱԱԾ գործակալ լինելու հանգամանքին, Factor.am-ի հետ զրույցում ասաց, որ ինքը դրա մասին խոսել է ասուլիսներից մեկում:

«2000թ. մարտի 10-ին մամլո ասուլիսի ժամանակ ես խոսել եմ այդ մասին: Այդ ասուլիսի սղագրված տարբերակը զետեղված է իմ՝ «Արդարադատության և քաղաքականության խառնարանում» գրքում, որը հրապարակվել է 2016թ.»,- ասաց Գագիկ Ջհանգիրյանը:

«Նաիրի Հունանյանը դեռևս 1988թ. գտնվել է ազգային անվտանգության մարմինների տեսադաշտում: Նա ուսումնասիրվել է որպես գործակալի թեկնածու՝ հավաքագրման նպատակով, որպեսզի օգտագործվի տարածաշրջանի երկրներից մեկի հատուկ ծառայությունների դեմ: Ինչպես հաստատում է ԱԱ նախարարության կողմից կատարված ծառայողական քննության եզրակացությունը՝ 1999թ. գարնանը Նաիրի Հունանյանի վերաբերյալ ազգային անվտանգության մարմիններում ստացվել է տեղեկություն, որի ստուգումը համապատասխան բաժինը գլխավորող ղեկավարի կողմից անուշադրության է մատնվել: Հակված եմ մտածելու, որ նշված պաշտոնյայի կողմից ծառայողական պարտականությունների պատշաճ կատարման դեպքում հնարավոր կլիներ խափանել Հոկտեմբերի 27-ի ոճրագործությունը»,- հայտարարել է Գագիկ Ջհանգիրյանը 2000 թ. մարտի 10-ին ասուլիսում:

Հիշեցնենք, որ Նաիրի Հունանյանի մասին Ռոբերտ Քոչարյանին ուղղված բաց նամակում խոսել էր պաշտպանության նախկին փոխնախարար Վահան Շիրխանյանը: «Երբ դու եկար, ԱԺ-ում իրավիճակը վաղուց և լիովին վերահսկում էր Ռազմական ոստիկանությունը, և քո նկարագրած «խառնաշփոթը» բացահայտ սուտ է: Ինձ, Ջհանգիրյանին և Գորիկ Հակոբյանին հրավիրեցիր Դեմիրճյանի աշխատասենյակ, որտեղ Գորիկ Հակոբյանը քեզ ներկայացրեց ԱԱԾ գործակալ Նաիրի Հունանյանի օպերատիվ գործի թղթապանակը, որը գործին կցելու՝ Ջհանգիրյանի բոլոր հետագա պահանջները մերժվեցին՝ ԱԱԾ-ի կողմից «նման գործ գոյություն չունի» պատճառաբանությամբ»,- դիմելով Ռ.Քոչարյանին՝ գրել էր Վ.Շիրխանյանը:

Արմինե Ավետյան