17.01.2026 | 20:00
ՔՆՆԱՐԿՈՒՄ․ ՀՀ-ն ինչպե՞ս է կատարել ԵՄ-ի հետ CEPA համաձայնագիրը․ մշտադիտարկման արդյունքներ
Կիլոգրամով վաճառելու դեպքում գազը կթանկանա 2.6 դրամով․ «Էքսպերտ թեչ»-ի տնօրեն
Տնտեսություն
18.03.2019 | 17:50
«Մինչ այժմ մեքենաները լիցքավորվել են խորանարդ մետրով և որպեսզի հասկանանք հարցի էությունը, պետք է նախ նկատենք, որ 1 խմ մետր գազը 700 գրամ է, եթե առաջ լիցքավորվելու էր 14 խմ մետր հիմա լիցքավորվելու է10 կգ: Եթե 1 խմ գազը իրացվում էր 200 դրամով, ապա այժմ 1 կգ գազը նույն համամասնությամբ պետք է արժենա 280 դրամ»,-այսօր հրավիրված մամուլի ասուլիսի ժամանակ, անդրադառնալով ապրիլի 1-ից սպասվող ավտոգազի թանկացմանը, ասաց «Անհատ տաքսի վարորդների պաշտպանություն» ՀԿ նախագահ Մխիթար Օհանյանը։
Նրա խոսքով՝ խորանարդ մետրը չի թանկանալու, պարզապես ապրիլի 1-ից հետո լիցքավորման չափման միավորը դառնալու է զանգված՝ կգ:
Մխիթար Օհանյանը նաև նշեց, որ այն գազը, որ ստանում ենք՝ պետք է սառեցված վիճակում ընդունել, որպեսզի շահեկան վիճակում հայտնվենք, իսկ դրա համար սառնարաններ են պետք:
Ասուլիսին ներկա «Էքսպերտ թեչ» գազաբալոնային սարքավորումների տեղադրման և փորձարկման լաբորատորիայի տնօրեն Մկրտիչ Տիգրանյանն էլ խնդրի վերաբերյալ նկատեց, որ արդեն իսկ կան հաշվարկներ, ըստ որոնց, 1000 խմ մետրի դիմաց վարորդը պետք է վճարի 2,6 դրամով ավելի թանկ։
Հարցին՝ հնարավո՞ր է՝ կիլոգրամով գազը վաճառելու դեպքում կարողանան խաբել վարորդներին, «Էքսպերտ թեչ» գազաբալոնային սարքավորումների տեղադրման և փորձարկման լաբորատորիայի տնօրենը պատասխանեց. «Գազալիցքավորման աշտարակներում դրված հաշվիչը ոչ թե խմ, այլ կիլոգրամ է կշռում, որը հետո գործակցի կիրառմամբ դառնում է խորանարդ մետր: Այսինքն, ի սկզբանե գազի իրացման չափը կիլոգրամով է կշռվում, և վարորդներին խաբելու հավանականությունը, կարելի է ասել՝ վերանում է»:
Նրա խոսքով՝ խորանարդ մետրի վերափոխման ժամանակ կիրառվող գործակիցն ամեն անգամ կարող է տարբեր լինել, որովհետև խողովակներով ստացվող գազը տարբեր խտությամբ է լինում, ու այն ստանդարտ պահել հնարավոր չէ:
«Չափագիտության ազգային ինստիտուտի կողմից բոլոր գազալցակայանները տարին մեկ անգամ կատարում են ստուգաչափում: Իրենց կշեռքով, գազի բալոնով գնում են, լիցքավորման աշտարակում նրանց ասում են՝ օրինակ, լիցքավորեք 10 կգ գազ, որից հետո համեմատում են աշտարակի վրայի ցուցմունքի հետ: Այսինքն, ամեն տարի բոլոր գազալիցքավորման աշտարակները կիլոգրամով ստուգաչափվում են, իսկ խորանարդ մետրի դեպքում ստուգաչափելու նման մեթոդիկա գոյություն չունի»,- նշեց նա։
Աղավնի Սուքիասյան
