Զենք-զինամթերքը շաղ էր տված գնդի տարածքով մեկ. «Սասնա ծռերի» գործով տուժող

«Սասնա ծռեր» խմբի տասը անդամի գործով այսօրվա դատական նիստի մեկնարկին պաշտպանական կողմը հերթական միջնորդությունը ներկայացրեց նիստերը կրկին դռնբաց անցկացնելու վերաբերյալ, որը կրկին մերժվեց:

Պաշտպանները միջնորդեցին նաև դատական նիստերի դահլիճ վերադառնալ թույլատրել խմբի դեռևս անազատության մեջ գտնվող անդամներից Սմբատ Բարսեղյանին, որի նկատմամբ սանկցիա էր կիրառվել և հեռացվել էր դահլիճից: Դատարանը բավարարեց այս միջնորդությունը:

Այսօր շարունակվեց տուժողների հարցաքննությունը: Որպես տուժող հարցաքննվեց Խաչատուր Ավետիսյանը, որը նույն թվականին եղել է ՊՊԾ գնդի հրամանատարը: Նա դատարանին պատմեց՝ օրվա պատասխանատուն եղել է Արթուր Վանոյանը. «Ինձ զանգել է երրորդ գումարտակի հրամանատարը և ասել, որ գնդի վրա զինված հարձակում է եղել: Տեսա Մարտիրոս Հակոբյանին, որը զինված էր և կոչ արեց միանալ իրենց: Նա կրակահերթ արձակեց զրահամեքենայի վրա, որի հետևանքով գնդակների անդրադարձ եղավ: Երկու ոստիկան և Ոստիկանության լրատվականի աշխատակիցը վիրավորվեցին: Կրակոցներ եղան նաև հսկիչ-անցագրային կետի կողմում՝ մի քանի զինված անձանց կողմից»:

Իր ղեկավարությամբ կազմակերպվել է ՊՊԾ գնդի հարակից շենքերի բնակիչների տարհանումը, որպեսզի ստեղծվեին անվտանգության գոտիներ. «Խմբի հանձնվելուց հետո մուտք եղավ գնքի տարածք՝ քննչական գործողություններից հետո: Գունդն ամբողջությամբ ավերված էր՝ շենքերը, դռները, պատուհանները: Բացել էին բոլոր չհրկիզվող պահարանները, զինանոցը դատարկ է եղել, զենք զինամթերքը՝ շաղ տված է եղել գնդի տարածքով, անգամ ՊՊԾ գնդի հարակից շենքերում է զինամթերք եղել»:

Այսօր կհարցաքննվեն հինգ տուժողներ:

Լիլիթ Շաբոյան