28.09.2026 | 11:11
ՏԻՄ ընտրությունների օրը ՆԳՆ 112 հեռախոսահամարին հանցագործությունների վերաբերյալ ահազանգ չի ստացվել
Արդեն 7 ժամ է՝ Հայաստանի և Արցախի Անվտանգության խորհուրդների նիստը շարունակվում է
Քաղաքականություն
12.03.2019 | 17:18
Ստեփանակերտում վաղ առավոտից մինչ այս պահը՝ արդեն շուրջ 7 ժամ, շարունակվում է Հայաստանի Հանրապետության և Արցախի Հանրապետության Անվտանգության խորհուրդների համատեղ նիստը․ այս մասին հայտնում է Արցախի մայրաքաղաքում աշխատող Factor.am-ի լրագրողը։ Հայաստանի Անվտանգության խորհրդի քարտուղարի մամուլի խոսնակ Արեգ Քոչարյանը Factor.am-ի լրագրողին ասել է, որ դեռ պարզ չէ, թե երբ է ավարտվելու նիստը։
Հավելենք, որ ի սկզբանե երեկ հայտարարվեց, թե Ստեփանակերտում կայանալու է Արցախի ԱԽ արտահերթ նիստ, այնուհետ հաղորդագրություն եղավ, որ Արցախի մայրաքաղաքում կայանալու է Հայաստանի ԱԽ հերթական նիստը, իսկ արդեն ուշ երեկոյան Նիկոլ Փաշինյանը իր ֆեյսբուքյան էջում գրեց, որ այսօրվա նիստը Արցախի և Հայաստանի Անվտանգության խորհուրդների համատեղ նիստ է:
Ժամը 14։48-ին Հայաստանի Կառավարության լրատվական ծառայությունը հրապարակել է հաղորդագրություն՝ ներկայացնելով Անվտանգության խորհուրդների նիստում ՀՀ վարչապետ Նիկոլ Փաշինյանի և ԱՀ նախագահ Բակո Սահակյանի ելույթները։
Վարչապետ Նիկոլ Փաշինյանն ասել է, որ Արցախի ներգրավվածությունը բանակցային գործընթացում Հայաստանի համար քմահաճույք չէ․
«Անհեթեթ են բոլոր այն մեկնաբանությունները, թե Հայաստանի Հանրապետությունը կամ վարչապետը այս դիրքորոշմամբ իրենց ուսերից թոթափում են պատասխանատվությունը և այն դնում են Արցախի իշխանության կամ ժողովրդի վրա: Որևէ շահարկման տեղ չթողնելու համար հարկ եմ համարում ընդգծել՝ Հայաստանի Հանրապետությունը եղել է, կա և կմնա Արցախի անվտանգության թիվ մեկ երաշխավորը և կշարունակի իր ներգրավվածությունը խաղաղության գործընթացում»:
Հայաստանի վարչապետը հիշեցրել է, որ բանակցությունների մինչ այժմ հայտնի շրջանակը ներառում է շահագրգիռ բոլոր կողմերին, բացի մեկից։ Նա վերստին ընդգծել է, որ բանակցություններում Արցախին ներկայացնողը պետք է լինի հենց Արցախի ներկայացուցիչը․
«Բայց գլխավոր հարցը հետևյալն է՝ իսկ բանակցային գործընթացում ո՞վ է ներկայացնում Արցախի ժողովրդին կամ, ինչպես որոշ դեպքերում ասվում է, Ղարաբաղի հայությանը: Խնդիրն այն է, որ բանակցային գործընթացում այսօր Արցախի ժողովրդին ներկայացնելու լիազորություն, լեգիտիմություն ունեցող որևէ ներկայացուցիչ չկա, որովհետև բանակցային սեղանի շուրջ ներկա չէ Արցախի ժողովրդի լիազորությունն ստացած որևէ սուբյեկտ: Բազմիցս ասել եմ, որ Հայաստանի վարչապետը չի կարող նման լիազորություն կատարել՝ այն պարզ պատճառով, որ Արցախի ժողովուրդը Հայաստանի ընտրություններին չի մասնակցում, չի քվեարկում և, ուրեմն Հայաստանի վարչապետը չի մտնում Արցախի ժողովրդին ներկայացնելու լիազորություն ունեցող անձանց շրջանակի մեջ»։
Ըստ Նիկոլ Փաշինյանի՝ հաջորդ կարևորագույն հարցը, որին անհրաժեշտ է պատասխանել, հետևյալն է՝ իսկ Հայաստանի կառավարություն ընդունո՞ւմ է արդյոք ԵԱՀԿ Մինսկի խմբի համանախագահների կողմից առաջ քաշվող 3 սկզբունքները և 6 տարրերը՝ որպես բանակցային գործընթացի հիմք․ «Իսկ ի՞նչ կարող են նշանակել այդ սկզբունքները գործնականում, և ո՞ւմն է դրանք մեկնաբանելու իրավունքը: Սա կարևոր է, որովհետև այն, ինչպես այդ սկզբունքները մեկնաբանում է Ադրբեջանը, մեզ համար անընդունելի է: Մենք, իհարկե, կարող ենք հանդես գալ այդ սկզբունքների սեփական մեկնաբանությամբ, բայց դա անիմաստ է, որովհետև մեր նպատակը ոչ թե լեզվակռիվն է, այլ արդյունավետ բանակցային գործընթացը: Եվ հետևաբար, բանակցային գործընթացի հիմք պետք է դառնան տարընթերցումների տեղիք չտվող արձանագրումները:
Բայց համանախագահների կողմից առաջարկված սկզբունքները, տարրերը, ինչպես արդեն նշեցի, վերջին 10 տարիներին ամենատարբեր և ամենատարածական մեկնաբանությունների տեղիք են տվել, և հետևաբար, առաջիկա բանակցային գործընթացի կարևորագույն նպատակը պետք է լինի այսպես ասած հիմնական հասկացությունների՝ 3 սկզբունքների և 6 տարրերի պարզաբանումը, և մենք պատրաստ ենք նաև այսպիսի խոսակցության»,- ասել է Հայաստանի վարչապետը։
Նարեկ Կիրակոսյան
