Քաղաքականություն
11.03.2019 | 13:08Վերջին շաբաթներին մամուլում տեղեկություններ են շրջանառվում, թե իբր վտանգված է Հայաստան-ՆԱՏՕ հետագա համագործակցությունը, և մասնավորապես՝ արգելակվել են «Անհատական գործընկերության գործողությունների» 6-րդ ծրագրի նախապատրաստական աշխատանքները։ Ըստ մամուլի հրապարակումների՝ Ռուսաստանի հետ հարաբերությունների անորոշության պատճառով Հայաստանի կառավարությունը որոշակի զգուշավորությամբ է մոտենում ՆԱՏՕ-ի հետ հարաբերություններին։
Այսօր «ՆԱՏՕ-ի շաբաթվա» միջոցառումներին նվիրված ասուլիսում Factor.am-ը հարց ուղղեց ՀՀ ԱԳՆ սպառազինությունների վերահսկման և միջազգային անվտանգության վարչության պետ, դեսպան Արմեն Եդիգարյանին, թե որքանով են իրականությանը համապատասխանում այս տեղեկատվությունը։
«Ես ուրախ եմ, որ այդ հարցը տվեցիք, որովհետև ես տեղյակ եմ այդ հրապարակումներից։ Ճիշտն ասած չեմ հասկանում, թե ով է դրա աղբյուրը, որովհետև եթե այդպիսի բան կար կամ ինձ պետք է հարցնեին, կամ ՊՆ իմ գործընկերոջը՝ Լևոն Այվազյանին։ Դա չի համապատասխանում իրականությանը»,- այսպես արձագանքեց ԱԳՆ պաշտոնյան։
Նկատենք, որ օրեր առաջ Factor.am-ը տեղեկատվության ճշգրտությունը ստուգելու նպատակով դիմել էր Հայաստանի արտաքին գործերի նախարարություն, որտեղից պատասխանել էին, թե տեղյակ չեն հարցից։ Դեսպան Արմեն Եդիգարյանն այսօր պարզաբանեց, որ Հայաստանը և ՆԱՏՕ-ն գտնվում են «Անհատական գործընկերության գործողությունների» 5-րդ ծրագրի ավարտական փուլում և իրենց հաշվարկով՝ արդեն այս տարվա երկրորդ կեսին կսկսվի 6-րդ ծրագրի նախապատրաստումը. «Եթե այս մեկը 2017-2019 թվականներն էր ընդգրկում, հաջորդը կլինի 2020-2022 թվականների համար։ Ուղղակի այստեղ խնդիր կա բանակցային և նախապատրաստական փուլի մասով, որն իմ փորձից կարող եմ ասել, որ տևում է մոտ կես տարի։ Կա այսպիսի մի կարևոր հանգամանք, դա մեր և ՆԱՏՕ-ի փոխըմբռնումն է, որ այնքան ժամանակ, որքան չի ընդունվել նոր ծրագիրը, գործում է հինը»։
Պարոն Եդիգարյանը հղում կատարեց նաև Կառավարության ծրագրին, որի արտաքին քաղաքականության բլոկում կա ՆԱՏՕ-ի հետ Հայաստանի համագործակցության զարգացման և շարունակականության վերաբերյալ նշում․ «Այսինքն՝ ուզում եմ ասել, որ ոչ մի այդպիսի քաղաքական խնդիր չկա։ Ամեն ինչը բանակցվում է, բանակցվում է կոնկրետ ծրագիրը։ ԱԳԳԾ-ի կառուցվածքը բաղկացած է նպատակներից, որ Հայաստանը հետապնդում է այս կամ այն նպատակը։ Թեմատիկ իմաստով մենք այնտեղ ունենք 4 բաժին՝ դա քաղաքական երկխոսությունն է և քաղաքական խնդիրները, շատ մեծ բաժին նվիրված է պաշտպանական բարեփոխումներին, կա արտակարգ իրավիճակների, բյուջետավորման մասեր, ինչպես նաև՝ անվտանգության խնդիրներ՝ կապված փաստաթղթերի շրջանառության հետ։ Այսինքն՝ ԱԳԳԾ-ն համապարփակ փաստաթուղթ է, և բնականաբար, այն պետք է քննարկվի։ Դա պեչատով չի դրվում․․․ ուղղակի ուզում եմ կրկնել այն փաստը, որ քաղաքական ոչ մի խնդիր մենք չունենք»։
Factor.am-ի հարցին պատասխանելով՝ Հայաստանի ՊՆ պաշտպանական քաղաքականության վարչության պետ Լևոն Այվազյանը հավելեց, որ ուշացման խնդիր չի լինի և ամեն ինչ իր հունով կընթանա: «Ուղղակի պետք է հասկանալ, որ փաստաթղթերի մշակումը, համաձայնեցումը, հաստատումը որոշակի գործընթաց է, որը նաև բյուրոկրատական պրոցեսներ է անցնում, թե՛ ՆԱՏՕ-ի ներսում, թե՛ Հայաստանի Հանրապետությունում, որը ժամանակ է պահանջում և երբեմն տեխնիկական պատճառներով կարող է մի փոքր ուշացումներ լինեն, ինչը զուտ տեխնիկական խնդիր է և քաղաքական խնդիր դրա մեջ հնարավոր չէ գտնել»,- ասաց Լևոն Այվազյանը։
Մանրամասները՝ տեսանյութում:
Ռոբերտ Անանյան
