ՀՀ-ԵՄ հարաբերություններում մեծ «տնային աշխատանք» ունենք անելու. Թևան Պողոսյանը՝ վարչապետի բրյուսելյան այցի արդյունքների մասին. ՏԵՍԱՆՅՈՒԹ

«Մարդկային զարգացման միջազգային կենտրոնի» ղեկավար Թևան Պողոսյանը կարծում է, որ վարչապետ Նիկոլ Փաշինյանի՝ Բրյուսել կատարած այցը պարտադիր էր, և լավ է, որ հանդիպումների ընթացքում եվրոպական հարթակն օգտագործվեց՝ բարձրաձայնելու այլ հարցեր:

«Օրինակ՝ Արցախի վերաբերյալ Հայաստանի մոտեցումները կամ ընդհանրապես տարածաշրջանի՝ նշելով, որ Հայաստանը հետաքրքրված է ունենալ ռեգիոնալ էներգետիկ ծրագրերում նույնպիսի դերակատարում: Դրանց մասին պետք չէ մոռանալ, որովհետև դրանք էլ նույնքան կարևոր խնդիրներ են»,- «Հայաստան-Եվրամիություն համաձայնագրի կիրարկման հեռանկարները» թեմայով քննարկման ժամանակ ասաց Պողոսյանը:

Սակայն, ըստ նրա, եթե վերցնենք կոնկրետ Հայաստան-Եվրամիություն օրակարգը, պետք է հասկանանք, որ մեծ տնային աշխատանք ունենք անելու:

Նախ, Թևան Պողոսյանի խոսքով, պետք է հասկանալ՝ արդյո՞ք ԵՄ-ում ընտրություններից հետո իրավիճակ է փոխվելու. «Ասում ենք, որ ամեն ինչ լավ է: Եկեք հիշենք, որ 2013 թվականի սեպտեմբերի 5-ին Հայաստանն ասաց՝ պատրաստ եմ քաղաքական բաղադրիչը ստորագրել հենց այսօր, բայց ԵՄ-ն ասաց՝ «կամ,կամ»: Սակայն 1.5 տարի ընտրություններ տեղի ունեցան ԵՄ-ում, և ԵՄ-ն ասեց՝ լավ, կարծես «և, և»-ն էլ է աշխատում, և մենք ունեցանք CEPA-ն»: Հիմա, նրա խոսքով, Հայաստանի իշխանությունները պետք է ուշադիր հետևեն, թե ինչ է լինելու ընտրություններում և ինչ արդյունք է գրանցվում:

«Կարող է՝ որևէ բան չփոխվի, հակառակը, ամեն ինչ ավելի արագ տեմպերով գնա: Բայց կարող է և ունենանք փոփոխություններ, որոնց պետք է պատրաստ լինենք և հասկանանք՝ հետո ինչպես ենք աշխատելու, որ այս պայմանավորվածություններն առնվազն իրագործվեն մեզ համար ցանկալի տեմպերի մեջ: Այստեղ մենք մեծ տնային աշխատանք ունենք»,- ասաց Թևան Պողոսյանը:

Ինչ վերաբերում է վիզաների ազատականացմանը: Ըստ Պողոսյանի՝ հիմա քաղաքական հայտարարությունների համար գեղեցիկ ժամանակ է, բայց պետք է իրականությունը հաշվի առնել և շատ չոգևորվել: Նա պարզաբանեց վիզաների ազատականացման գործընթացներն ու ժամկետները:

«Վիզաների ազատականացման գործընթացը հետևյալն է: Առաջին փուլը քաղաքական որոշման փուլն է, երբ Եվրոպական խորհուրդը ընդունում է քաղաքական որոշում և հանձնարարում է Եվրոպական հանձնաժողովին՝ սկսել տեխնիկական բանակցությունները: Տեղի կունենա՞, արդյոք, այդ քաղաքական որոշումը մինչև ընտրությունները, թե կմնա հաջորդ Եվրոպական խորհրդին, դա խնդիր է, որ պետք է հասկանալ, որ չպետք է ձեռքներս ծալած նստենք: Պետք է բարեփոխումներ անել, տեխնիկական փաթեթը վերցնել, դրանով և՛ Ուկրաինան է անցել, և՛ Վրաստանը, և՛ Մոլդովան: Դժվար չի դրանք վերցնել»,- ասաց նա:

Ըստ Պողոսյանի՝ մի քանի խնդիր Հայաստանն արդեն իրականացրել է, և ձգձգումն իսկապես եվրոպական կողմից է եղել. «Հայաստանի տեխնիկական պատրաստվածությունը գնահատման փուլին եղել է դեռ 2018 թվականի աշնանը, երբ մենք պատրաստ կլինեինք անցնել այդ գնահատումը»:

Իսկ բուն բանակցությունները կսկսվեն, երբ լինի քաղաքական որոշումը: Բանակցային գործընթացը կարող է 1-2 ամիս տևել, բայց հետո արդեն՝ տեխնիկական պայմանների իրագործումը, Թևան Պողոսյանի խոսքով, տևելու է առնվազն չորս տարի:

Մանրամասները՝ տեսանյութում: