Քննարկվում է երեք կարևորագույն մշակութային բուհ Գյումրի տեղափոխելու հարցը՝ քաղաքի սպասարկման ոլորտն ակտիվացնելու նպատակով

Շիրակի մարզում տնտեսական կյանքն ակտիվացնելու նպատակով նոր իշխանության օրոք ևս քննարկվում է մի քանի բուհեր Գյումրի տեղափոխելու հարցը: Խոսքը, մասնավորապես, Երևանի կինոյի և թատրոնի ինստիտուտի, Երևանի Կոմիտասի անվան պետական կոնսերվատորիայի և Երևանի գեղարվեստի պետական ակադեմիայի մասին է:

Այս մասին Factor.am-ին տեղեկացնում են կառավարության մեր աղբյուրները: Նրանց փոխանցմամբ՝ նախաձեռնությունը Կրթության և գիտության նախարար Արայիկ Հարությունյանինն ու տարածքային կառավարման և զարգացման նախարար Սուրեն Պապիկյանինն է:

Մեր աղբյուրի փոխանցմամբ՝ այս տեղափոխության արդյունքում ենթադրվում է, որ յուրաքանչյուր տարի Գյումրի կուղևորվի մինչև վեց հազար ուսանող, ինչպես նաև դասախոսներ, որոնք կնպաստեն սպասարկման ոլորտի ակտիվացմանը: Բուհերը Գյումրի տեղափոխելու տեղեկությունները Factor.am-ի հետ զրույցում չհերքեց նաև ԿԳ նախարար Արայիկ Հարությունյանը: Նա, սակայն, մեր հարցին ի պատասխան ասաց, որ դրա մասին խոսելը դեռ վաղ է, քանի որ եղել է նման առաջարկ, բայց՝ ոչ վերջնական որոշում:

«Ընդհանրապես բուհերի տեղափոխման շատ առաջարկներ կան: Տարբեր մարդիկ տարբեր առաջարկներ են անում, բայց լուրջ քննարկում չի եղել: Հիմա բուհական համակարգի բարեփոխման ճանապարհին նաև այդ տարբերակները կարող ենք քննարկել: Նման առաջարկ եղել է և հետաքրքիր առաջարկ է: Քննարկվում է նաև Գյումրիում գործող բոլոր բուհերը միավորելու և հզոր համալսարան դարձնելու հարցը»,- ասաց նախարարը:

Արայիկ Հարությունյանը հավելեց, որ այդ հարցերը քննարկվելու են «Բարձրագույն կրթության մասին» ՀՀ օրենքի փոփոխությունից հետո: Կառավարության մեր աղբյուրը միաժամանակ նշեց, որ բուհերի Գյումրի տեղափոխելու հարցն ավելի արդիական կդառնա, երբ ավարտվի «Հյուսիս-հարավ» ավտոմայրուղու շինարարությունը:

Հավելենք, որ նախորդ իշխանությունների ժամանակ էլ քննարկվել է այս կամ այն գերատեսչությունը Գյումրի տեղափոխելու հարցը: Մասնավորապես՝ քննարկվել է Մշակույթի, սպորտի և երիտասարդության հարցերի նախարարությունների, ինչպես նաև Հայաստանի ֆիզիկական կուլտուրայի և սպորտի պետական ինստիտուտի տեղափոխության տարբերակը: Սակայն այս մտադրություններն այդպես էլ մնացել են խոսակցությունների մակարդակում:

Նարեկ Կիրակոսյան