Պռոշյանում հայտնաբերված փոքրիկին՝ Մարիամ Պռոշյանին, որդեգրել ցանկացողներ կան

Օգոստոսի 12-ին Պռոշյան համայնքում ծառի տակ հայտնաբերված երեխային որդեգրել ցանակացողներ կան: Այս մասին Factor.am-ի հետ զրույցում տեղեկացրեց Պռոշյան համայնքի ղեկավար Արթուր Մուրադյանը:

«Ցանկություն հայտնողներ եղել են, բայց դեռ պարզ չի՝ ինչ կլինի: Թերթերում կարդացել են, ապա ցանկություն հայտնել փոքրիկին որդեգրել: Հնարավոր է՝ նրան որդեգրեն, լավ, սիրուն երեխա է»,- մեզ հետ զրույցում ասաց Արթուր Մուրադյանը:

Հիշեցնենք՝ օգոստոսի 12-ին Պռոշյան համայնքի Տեղերաշեն փողոցի հողամասի ծառի տակ նորածին երեխա էր հայտնաբերվել, նրան տեղափոխել էին հիվանդանոց: Համայնքի ղեկավարի փոխանցմամբ՝ այժմ զբաղված են փորքրիկի փաստաթղթերի պատրաստմամբ՝ նրան մանկատուն տեղափոխելու համար:

«Էսօր նիստ ենք արել որոշել ենք՝ երեխայի անունը Մարիամ է լինելու, ազգանունը՝ Պռոշյան, անվան ընտրությունը պայմանավորված է նրանով, որ երեխային գտնելու օրը համընկել է Խաղողօրհնեքի տոնի հետ, իսկ ազգանունը՝ Պշոռյան համայքում նրան գտնելու փաստով»,- մանրամասնեց համայնքի ղեկավարը:

Արթուր Մուրադյանի փոխանցմամբ՝ ինքը պարբերաբար այցելում է հիվանդանոցում գտնվող փոքրիկին, նրա առողջական վիճակը լավ է: Սուրբ Աստվածամայր ԲԿ-ի վերակենդանացման և ինտենսիվ թերապիայի բաժանմունքի ղեկավար Աննա Չոբանյանը ևս մեզ հետ զրույցում հավաստիացրեց՝ փոքրիկի մոտ լուրջ առողջական խնդիրներ չկան: Չոբանյանը, սակայն, այլ մանրամասներ չհայտնեց՝ պատճառաբանելով, որ քննություն է ընթանում և իրավապահ մարմիններն իրենց հորդորել են տեղեկություններ չտրամադրել:

Մեր հարցին՝ փոքրիկը բացի համայնքի ղեկավարից այլ այցելու ունեցել է այս ընթացքում, Չոբանյանն ասաց, որ ոչ: «Երեխային այցելել է միայն համայնքի ղեկավարը»,- եզրափակեց Աննա Չոբանյանը:

Շողիկ Գալստյան