10.10.2026 | 15:55
Հոկտեմբերի 13-ից Հայաստանում սպասվում է անձրև և ամպրոպ
Երբ ապացուցվի, որ ԱԱԾ-ական ճնշում է եղել ԵՊՀ հոգաբարձուների խորհրդի որևէ անդամի վրա, ես հրաժարական կտամ. ԿԳ նախարար. ՏԵՍԱՆՅՈՒԹ
Հասարակություն
27.02.2019 | 16:10
Այն օրը, երբ կապացուցվի, որ որևէ ոստիկանական կամ ԱԱԾ-ական ճնշում է եղել հոգաբարձուների խորհրդի որևէ անդամ վրա, այդ օրը ես հրաժարական կտամ։ ԱԺ-ում լրագրողների հետ զրույցում Factor.am-ի հարցին ի պատասխան ասաց ՀՀ ԿԳ նախարար Արայիկ Հարությունյանը՝ անդրադառնալով տեղեկություններին, թե իրավապահ համակարգի ներկայացուցիչները հրավիրում են ԵՊՀ հոգաբարձուների խորհրդի անդամներին՝ հորդորելով չքվեարկել ԵՊՀ ռեկտոր Արամ Սիմոնյանի օգտին:
«Այս «ասում են»-ները կարելի է ստուգել: Այսքան օրերի ընթացքում, որ ասում են, որևէ խորհրդի անդամի հետ խոսե՞լ եք, հարցրե՞լ եք՝ նրանց իրավապահ համակարգից կանչե՞լ են»,- ասաց նախարարը՝ հավելելով, որ ինքը մեկ ապացույց անգամ չի տեսնում, որը կփաստի խորհրդի անդամների վրա ճնշումները:
Արայիկ Հարությունյանն անհիմն է համարում հայտարարությունները, թե ԵՊՀ ռեկտոր Արամ Սիմոնյանի նկատմամբ քաղաքական ճնշում է գործադրվում, քանի որ ցանկանում են ռեկտորի պաշտոնում իրենց թեկնածուին տեսնել:
«Նման բան բացառվում է, ու մինչև հիմա Արամ Սիմոնյանի հետ եղել են բացառապես գործընկերային հարաբերություններ: Ինքն է փորձում այս ամենը քաղաքականացնել՝ պրոցեսի մեջ ներքաշելով նաև իր գործընկերներին: Ես պարզապես իր գործընկերներին կոչ կանեմ չտրվել այս սադրանքներին: ԵՊՀ-ում երկար ժամանակ աշխատել եմ, այնտեղ և՛ գիտխորհրդում, և՛ բոլոր ֆակուլտետներում կան հոյակապ մասնագետներ։ Իմ նշանակվելուց հետո Արամ Սիմոնյանին և մնացած բոլոր ռեկտորներին հավասար ու արդար վերաբերմունք եմ ցուցաբերել ու ցուցաբերելու եմ։ Մեր նախարարության ամենաբարձր պաշտոններին կան մարդիկ, որոնք Արամ Սիմոնյանի կուսակիցներն են»,- շարունակեց Հարությունյանը։
Անդրադառնալով ի պաշտպանություն Արամ Սիմոնյանի անցկացվող ակցիաներին՝ նա հիշեցրեց, որ նախկինում որևէ նմանատիպ ակցիայի դիմաց իշխանությունները զորք էին իջեցնում, իսկ հիմա իրենց համար ընդունելի է օրենքի շրջանակում անցկացվող ցանկացած ակցիա: «Մարդիկ իրավունք ունեն նման ակցիաներ անել, օրենքով երկիր է, թե իրականացնեն»,- նշեց նա։
Դիտարկմանը, որ ցուցարարները հայտարարել են, թե կշրջափակեն բուհը, որպեսզի թույլ չտան ԵՊՀ հոգաբարձուների խորհուրդը նիստ անցկացնի, Արայիկ Հարությունյանն արձագանքեց. « Օրենքի ու իրավունքի սահմաններում յուրաքանչյուրը կարող է անել որոշակի գործողություններ, որոնք թույլ կտան կարծիք արտահայտել։ Այս իշխանություններն այդ իրավունքը հարգում են»: Ինչ վերաբերում է ԵՊՀ-ում ՊՎԾ-ի ստուգումներին, նախարարն ասաց. «Ես՝ որպես ԿԳՆ, զրո ինֆորմացիա ունեմ, թե ՊՎԾ-ն կամ մյուս մարմիններն ի՞նչ ստուգումներ են անցկացնում բուհերում, քանի դեռ այդ փաստաթուղթը ստորագրությամբ ու կնիքով չի դրվել իմ սեղանին: Սա իմ անխախտելի սկզբունքն է»:
Մանրամասները՝ տեսանյութում:
Նարեկ Կիրակոսյան
