22.05.2026 | 23:50
Անդրանիկ Թևանյանի նկատմամբ հարուցվել է քրեական հետապնդում պետական դավաճանության հանցակազմի հատկանիշներով
ԱՄՆ-ի նոր պատժամիջոցների դեպքում Իրանը սպառնում է դուրս գալ միջուկային համաձայնագրից
Քաղաքականություն
15.08.2017 | 13:26
Իրանը սպառնում է անմիջապես դուրս գալ միջուկային համաձայնագրից, եթե Վաշինգտոնը նոր պատժամիջոցներ սահմանի Թեհրանի դեմ, հայտարարել է Իրանի Իսլամական Հանրապետության նախագահ Հասան Ռոհանին. փոխանցում է ТАСС-ը:
«Եթե ԱՄՆ-ն ցանկանա դիմել նույն այն մեթոդներին՝ պատժամիջոցներին, ապա մենք կարճ ժամանակամիջոցում, ոչ թե շաբաթվա կամ ամսվա ընթացքում, այլ մի քանի օրից կամ ժամից, կվերադառնանք նախկին՝ միջուկային գործարքի կնքմանը նախորդած իրադրությանը»,- ասել է նա:
Հիշեցնենք, որ Իրանը և գերտերությունների «վեցյակը»՝ Ռուսաստանը, Մեծ Բրիտանիան, Չինաստանը, ԱՄՆ-ը, Ֆրանսիան և Գերմանիան, 2015 թվականի հուլիսի 14-ին համաձայնության եկան իրանական միջուկային ծրագրի բազմամյա խնդրի կարգավորման շուրջ՝ ընդունելով համատեղ համապարփակ գործողությունների պլան, որի իրագործումն սկսելու մասին հայտարարվեց 2016 թվականի հունվարի 16-ին: Այն նախատեսում է Իրանի միջուկային ծրագրի կապակցությամբ այդ երկրի նկատմամբ ՄԱԿ-ի Անվտանգության խորհրդի, ԱՄՆ-ի և Եվրամիության կողմից սահմանված պատժամիջոցների չեղարկում: Փոխարենը Թեհրանը պարտավորվեց սահմանափակել իր միջուկային գործունեությունը՝ այն դնելով միջազգային հսկողության ներքո:
