16.11.2024 | 20:02
Ֆրանսիայի ռեստորաններից մեկում պատանդ վերցված 4 աշխատակիցներն ազատ են արձակվել
S&P Global-ը հաշվել է պարապուրդի արդյունքում ԱՄՆ տնտեսական կորուստները
Քաղաքականություն
28.01.2019 | 17:36
ԱՄՆ-ի տնտեսությունը դաշնային կառավարության աշխատանքի դադարեցման արդյունքում առնվազն 6 մլրդ դոլարի կորուստ է ունեցել։ Կորստի չափը հաշվել է S & P Global Ratings-ը: Աշխատանքի դադարեցումը հարվածել է արտադրողականությանը և բիզնեսի տնտեսական ակտիվությանը. hայտնում է thehill.com-ը:
Նախագահ Թրամփը հունվարի 25-ին համաձայնել էր դադարեցնել կառավարության 35-օրյա հարկադիր պարապուրդը և պետական աշխատողների ֆինանսավորման կասեցումը: Կոնգրեսն այդպես էլ չէր փոխանցել Մեքսիկայի հետ սահմանին պատի կառուցման համար անհրաժեշտ 5,7 մլրդ դոլարը: Այս «շաթդաուն»-ն ԱՄՆ-ի պատմության մեջ ամենաերկարն էր։
«Թեպետ «շաթդաուն»-ն ավարտվել է, հավանական է, որ այն կազդի գործարար վստահության և ֆինանսական շուկայում տրամադրությունների վրա», – նշում է S&P-ն:
ԱՄՆ կառավարության աշխատանքների մասնակի դադարեցումը կարող է նվազեցնել մասնավոր երաշխավորների ու մատակարարների դրամական հոսքերը և եկամուտները, քանի որ պետական ծառայությունների խոշոր մատակարարների մեծամասնությունն իր եկամուտների հիմնական մասը ստանում է ԱՄՆ Պաշտպանության նախարարությունից:
Այնուամենայնիվ, տուժել են նաև կառավարության մյուս գործընկեր-մատակարարները: Օրինակ՝ երկու խոշորագույն ընկերություններ Leidos Holdings Inc.-ը և SAIC-ը, որոնք ապահովում են քաղաքացիական կառավարական գործակալությունների համար իրենց վաճառքի ավելի քան 35 տոկոսը: SAIC-ը վերջերս հայտարարել էր, որ կառավարության աշխատանքի կասեցման պատճառով շաբաթական մոտ 10 մլն դոլարի վաճառք է կորցնում։ Բացի այդ, ընկերությունը նշել էր, որ կառավարությունը նրան 50 մլն դոլար է պարտք: Փոքր մասնավոր ընկերություններից շատերը նույնպես մեծապես կախված են քաղաքացիական կառավարական հաստատություններից:
Նշենք, որ ավելի վաղ ԱՄՆ կառավարության տնտեսական խորհրդատվության խորհուրդը 2019 թվականի առաջին կիսամյակի համար երկրի ունեցած տնտեսական կորուստը ՀՆԱ-ի 0,1%-ով էր գնահատել։
S&P Global-ի տնտեսագետներն ակնկալում են, որ հաջորդ տարվա ընթացքում երկրի ՀՆԱ-ն կրկին անկում կունենա։
