11.12.2024 | 23:30
Թուրքիան Մեծ Բրիտանիայից շահագործումից հանված Super Hercules ռազմատրանսպորտային ինքնաթիռներ կգնի
«Դժվար թե անձը, ում վրա ծանր մեղադրանքներ են դրվել, մինչև մահ հացադուլ աներ, եթե առաջադրված մեղադրանքի հետ կապված հարցեր չունենար». իրավապաշտպան. medialab.am
Հասարակություն
27.01.2019 | 14:50
«Նուբարաշեն» քրեակատարողական հիմնարկում կալանավոր Մհեր Եղիազարյանի մահը փաստում է, որ Հայաստանի քրեակատարողական հիմնարկներում մեծ հաշվով մտածողության փոփոխություն չի եղել անձի առողջության և կյանքի պահպանման հարցերում: «Մեդիալաբի» հետ զրույցում նման դիտարկում է անում Հելսինկյան կոմիտեի նախագահ, իրավապաշտպան Ավետիք Իշխանյանը:
Նրա խոսքով՝ հեղափոխությունից հետո սա հայաստանյան քրեականատարողական հիմնարկներում անձի կյանքի ու առողջության նկատմամբ վերաբերմունքի առաջին աղմկահարույց և ամոթալի դեպքն է:
«Ցավալի է այն, որ ես չեմ իմացել, որ մեր օրերում կա կալանավոր, որը հայատարարել է հացադուլ:Սա փաստում է, որ մեծ հաշվով փոփոխություն չկա,- ասում է իրավապաշտպանը։-Ինքս տեղեկացված չեմ եղել, որ այդպիսի դեպք կա, ես չեմ իմացել, որ կա դատապարտյալ, որը հայտարերել է հացադուլ։ Եվ ես այդ հարցում ներողություն եմ խնդրում բոլորից»։
Հիշեցնենք, որ «Նուբարաշեն» քրեակատարողական հիմնարկում մահացել է «Հայոց Արծիվներ. Միասնական Հայաստան» կուսակցության փոխնախագահ, «Haynews.am» լրատվական կայքի պատասխանատու Մհեր Եղիազարյանը:
Նա նախորդ տարվա դեկտեմբերի 5-ից հացադուլ էր հայտարարել, այսինքն՝ 44 օր գտնվում էր հացադուլի մեջ և հունվարի 26-ի վաղ առավոտյան մահացել է:
Մհեր Եղիազարյանը մեղադրվում էր ՀՀ քրեական օրենսգրքի 178 հ․ 2-րդ և 3-րդ մասերով, 38-34-312 հ․ 2-րդ և 3-րդ մասերով: Նա հացադուլ էր հայտարարել՝ պահանջելով խափանման միջոցի փոփոխություն: Մարդու իրավունքների պաշտպանի հետ ավելի վաղ ունեցած հանդիպման ժամանակ Եղիազարյանը բարձրացրել էր իր վերաբերյալ քրեական գործով բազմակողմանի, լրիվ ու օբյեկտիվ քննության հարցը և ասել, որ հացադուլ է հայտարարել: Նաև ասել էր, որ ուներ սիրտ-անոթային հիվանդություն, ինչը համատեղի չէր խափանման միջոցի հետ:
«Հացադուլից շուրջ 10 օր հետո՝ այսօր առավոտյան, Մհեր Եղիազարյանի ինքնազգացողությունը կտրուկ վատացել է, և ժամանած շտապ օգնության բժիշկների կողմից արձանագրվել է նրա մահը:ՀՀ քննչական կոմիտեի ԵՔՔՎ Էրեբունի և Նուբարաշեն վարչական շրջանների քննչական բաժնում Մհեր Եղիազարյանի մահվան հանգամանքները պարզելու համար նախապատրաստվող նյութերով նշանակված դիակի դատաբժշկական փորձաքննության շրջանակներում պարզվել է, որ նրա մահը վրա է հասել սրտամկանի ինֆարկտից»,-նշված է պաշտոնական պարզաբանման մեջ։
Իրավապաշտպան Ավետիք Իշխանյանը ցավալի է համարում այն, որ կալանավորի հայտարարած հացադուլի մասին բավարար տեղեկատվություն չի եղել, հասարակությունը տեղեկացված չէր, այնինչ մարդը 44 օր գտնվել է հացադուլի մեջ:
«Աղմուկ չի եղել, փաստորեն հասարակությունը չի իմացել այդ դեպքի մասին: Բայց դա ամենևին չի արդարացնում Հայաստանի իշխանությունների վերաբերմունքը այդ դեպքի հետ կապված»,- «Մեդիալաբին» ասում է իրավապաշտպանը,-
Իշխանյանը նշում է, որ իր սուբյեկտիվ տեսակետն այն է, որ «դժվար թե անձը, ում վրա ծանր մեղադրանքներ են դրվել, մինչև մահ հացադուլ աներ, եթե առաջադրված մեղադրանքի հետ կապված հարցեր չունենար»:
«Դժվար թե նա դիմեր այդ ծայրահեղ քայլին, գնար հացադուլի մինչև մահ: Սա բավական լուրջ խնդիր է, գուցե մեղադրանքն այն չի եղել: Մի փոքր իմ ասածում մի գուցե սուբյեկտիվիզմ կա, բայց չեմ կարծում, որ այդպիսի հանցագործության մեջ մեղադրվող մարդը նման սկզբունքային քայլի գնար»,- հավելեց նա:
Անկախ ամեն ինչից, ըստ Իշխանյանի, հարց է ծագում՝ համապատասխան մարմինները, դատախազները, քննիչները, արդարադատության նախարարությունը արդյոք ամեն ինչ արե՞լ են, որ այդ մահը տեղի չունենա:
«Ես նկատի ունեմ՝ խափանման միջոցը փոխելու հարցը, Արդարադատության նախարարության որոշումով նրան հիվանդանոց տեղափոխելը՝ կյանքը փրկելու համար, և այլն: Սպասենք, թե ինչ ցույց կտա ծառայողական քննությունը, բայց համենայնդեպս սա ամենամեղմ որակավորմամբ կարելի է գնահատել անփութություն, անտարբերություն մարդկային ճակատագրի վերաբերյալ, ինչը նույնպես հանցագործություն է: Այսինքն՝ նոր իշխանությունների օրոք ազատազրկման վայրերում մարդկանց առողջության պահպանման հարցերում փոփոխոթյուն չկա»,- ասում է Իշխանյանը:
