«Դա ինձ համար անվտանգության գոտի չի, հայրենիք ա»․ ԼՂՀ ինքնապաշտպանական ուժերի առաջին հրամանատարի պատասխանը Արցախի պաշտպանության նախարարին

Արցախի ինքապաշտպանական ուժերի առաջին հրամանատար, պահեստի գնդապետ Արկադի Կարապետյանը՝ Ագոն, factor.am-ի հետ զրույցում անընդունելի է համարում, որ Արցախի պաշտպանության նախարար Լևոն Մնացականյանը վերջերս Հանրային հեռուստաընկերությանը տված հարցազրույցում անվտանգության գոտի է անվանել Արցախի ազատագրված տարածքները։ 

«Դա ինձ համար անվտանգության գոտի չի, հայրենիք ա, և ճիշտ չեմ համարում, որ ասում են անվտանգության գոտի, որովհետև դա ազդում ա ժողովրդի վրա, միտք ա փոխում»,- ասաց գնդապետը՝ շարունակելով․ «Դրա համար մեր քաղաքագետները, նամանավանդ զինվորականները էլ անվտանգության գոտի բառը չպետք է օգտագործեն»։

Արկադի Կարապետյանը համարում է, որ անցյալ տարվա ապրիլյան պատերազմի ժամանակ հնարավորություն կար ոչ միայն կորցրած 800 հեկտարը հետ բերելու, այլև ավելի առաջ գնալու։ «Մենք դեռ ապրիլին պետք է քշեինք առաջ։ Մենք ապրիլին շատ հեշտ ու հանգիստ կարող էինք Եվլախը վերցնեինք, էլ չեմ ասում՝ մնացածը էդ պահին, բայց որ կհասնեինք Քուռ գետ, միանշանակ է»,- ասաց նա։

Ըստ Արցախում ապրող նախկին հրամանատարի՝ ապրիլից հետո արցախցիների տրամադրությունները փոխվել են, ավելի արմատական են դարձել։ Իսկ Ռուսաստանի կողմից զենքի վաճառքը Ադրբեջանին ավելի վճռական տրամադրություններ է առաջացնում Արցախի հանրության շրջանում։

Մանրամասները դիտեք factor.am-ի հետ Արցախի ինքնապաշտպանական ուժերի առաջին հրամանատար Արկադի Կարապետյանի հարցազրույցում։

Մարինե Խառատյան