16.06.2026 | 18:24
Շանհայի համագործակցության կազմակերպության գլխավոր քարտուղարը շնորհավորել է Փաշինյանին
ՄԻՊ միջնորդությամբ զինվորական հաշմանդամության կենսաթոշակի վրա կիրառված ԴԱՀԿ արգելանքը հանվել է
Հասարակություն
03.08.2017 | 17:32
ՀՀ Մարդու իրավունքների պաշտպանին հասցեագրած բողոքով քաղաքացին տեղեկացրել է, որ Դատական ակտերի հարկադիր կատարման ծառայությունը բռնագանձում է տարածել զինվորական հաշմանդամության կենսաթոշակի վրա:
Խնդրի կապակցությամբ Պաշտպանի աշխատակազմում սկսվել է բողոքի քննարկման ընթացակարգ:
Ինչպես տեղեկացնում են ՀՀ ՄԻՊ գրասենյակից, իրավասու պետական մարմնի հետ կատարված համատեղ աշխատանքների արդյունքում Դատական ակտերի հարկադիր կատարման ծառայության կողմից որոշում է կայացվել քաղաքացու դրամական միջոցների վրա դրված արգելանքը հանելու մասին: Իրազեկում. «Դատական ակտերի հարկադիր կատարման մասին» ՀՀ օրենքի 60-րդ հոդվածի համաձայն՝ կատարողական թերթով բռնագանձում չի կարող տարածվել այն դրամական գումարների վրա, որոնքվճարվում են`
• հաշմանդամներին.
• ծառայողական պարտականությունները կատարելիս ստացած հաշմության (վիրավորվել, կոնտուզիա, վնասվածք) համար այդ անձանց կամ նրանց մահվան դեպքում` ընտանիքներին. • առողջության, ինչպես նաև կերակրողի մահվամբ պատճառված վնասների հատուցման համար.
• ալիմենտային պարտավորությունների համար.
• որպես պետական նպաստ.
• վնասակար կամ ծայրահեղ դժվարին պայմաններում աշխատող անձանց` որպես փոխհատուցում.
• տուժողին` լրացուցիչ սննդի, առողջարանային բուժման, պրոթեզավորման և նրա խնամքի համար.
• աշխատանքից ազատվելու դեպքում` որպես արձակման նպաստ: ՀՀ մարդու իրավունքների պաշտպանի աշխատակազմ
