13.01.2026 | 23:28
ՆԳՆ շրջիկ սպասարկման գրասենյակները ծառայություններ կմատուցեն Գեղարքունիքի և Վայոց ձորի մարզերում
Ոսկեվանում հակառակորդի կրակոցներից այրվել է ցորենի բերքը
Քաղաքականություն
31.07.2017 | 11:23
Տավուշի մարզի սահմանամերձ Ոսկեվան գյուղում երեկ հակառակորդի կրակոցներից բռնկված հրդեհի արդյունքում այրվել է ցորենի բերքը, որն օրեր շարունակ բնակիչները չէին կարողանում հավաքել: Այս մասին Factor.am-ին հայտնեց Ոսկեվան համայնքի ղեկավար Սերյոժա Ալեքսանյանը։
«2-3 հա ցորեն էր մնացել առանց հավաքելու, էդ ամբողջն այրվեց»,- պատմեց Սերյոժա Ալեքսանյանը՝ հավելելով, որ երեկ կեսօրին հնչած կրակոցներից հետո գյուղում իրավիճակը խաղաղ է:
Նշենք, որ վերջին օրերին հակառակորդը կրակահերթերի տակ էր պահում հացահատիկի ցանքատարածությունները՝ փորձելով խոչընդոտել ոսկեվանցիների ցորենի բերքահավաքը: «Հնարավոր չէ որևէ բան անել, ուղիղ նշանառության տակ ա տարածքը, ինչո՞վ պիտի առաջը փակեն: Բանակն ինչ պետք ա՝ անում ա, դրանից ավել ոչ մի բան հնարավոր չէ անել»,- մեզ հետ զրույցում ասաց Ոսկեվան համայնքի ղեկավարը:
Հիշեցնենք՝ մոտ մեկ շաբաթ առաջ էլ ադրբեջանական զինուժը կրակել էր Չինարի համայնքի ուղղությամբ, ինչի հետևանքով հրդեհվել էր անասնապահական ֆերմա, գյուղը կրել էր զգալի նյութական վնասներ:
Շողիկ Գալստյան
