12.10.2026 | 21:29
Թեհրանն անվտանգության համաձայնագիր է առաջարկում․ Ալիևն ընդունել է Իրանի ներքին գործերի նախարարին
Սպառազինության մատակարարումները մեծացնում են դրա կիրառման սպառնալիքը. ԱԳՆ խոսնակը՝ Բաքվին զենք վաճառելու մասին
Քաղաքականություն
20.12.2018 | 13:45
Հայաստանը կարծում է, որ Հարավային Կովկասում շարունակվող սպառազինությունների մրցավազքը պետք է դադարեցվի: Դեկտեմբերի 20-ին լրագրողների հետ ճեպազրույցում այս մասին ասաց ՀՀ ԱԳՆ խոսնակ Աննա Նաղդալյանը:
Պատասխանելով Մինսկի կողմից Բաքվին զենք մատակարարելու մասին Բելառուսի նախագահ Ալեքսանդր Լուկաշենկոյի հայտարարության մասին հարցին՝ Աննա Նաղդալյանը նշեց, որ վարչապետի պաշտոնակատարն ու նրա մամլո խոսնակն արդեն մեկնաբանել են այն. «ԱԳՆ-ի կողմից կարող են հավելել, որ տարածաշրջանում սպառազինության մրցավազքի կանխարգելումն ուշադրության կենտրոնում է: Մեզ համար սկզբունքային դիրքորոշում է, որ սպառազինությունների մրցավազքը տարածաշրջանում պետք է կանխվի»:
Աննա Նաղդալյանի խոսքով՝ դա հանգեցնում է անկայունության աճին: «Սպառազինության մատակարարումները մեծացնում են դրա կիրառման վտանգը: Այն, ինչ ոմանց համար բիզնես է, մեզ համար մահացու վտանգ է ներկայացնում: Այս հարցը մշտապես բարձրացվում է գործընկերների և բազմակողմ հանդիպումներում: Տարածաշրջանում սպառազինության մրցավազքը պետք է դադարեցվի»,- ասաց ԱԳՆ մամլո խոսնակը:
Նա, միաժամանակ, ընդգծեց, որ ասվածը չպետք է շփոթել կարողությունների կամ վճռականության պակասի հետ. «Հայաստանի ԶՈՒ-ն բավական պատրաստված և զինված է՝ երաշխավորելու Հայաստանի և Արցախի անվտանգությունը: Այստեղ երկու կարծիք լինել չի կարող»:
