Ռուբեն Ռուբինյանը, Մխիթար Հայրապետյանը, Վարազդատ Կարապետյանը եւ Բաբկեն Թունյանն՝ ԱԺ հանձնաժողովների նախագահներ

Տեղեկացրել էինք, որ այսօր «Մարիոթ» հյուրանոցում տեղի է ունենալու «Իմ քայլը» խորհրդարանական ապագա խմբակցության անդամների հավաք-ժողովը: Այն վարել է վարչապետի պաշտոնակատար Նիկոլ Փաշինյանը:
Հավաքում քվեարկության է դրվել Արարատ Միրզոյանին Ազգային ժողովի նախագահի պաշտոնում, Լենա Նազարյանին եւ Ալեն Սիմոնյանին՝ փոխնախագահների պաշտոնում առաջադրելու հարցը: Խմբակցության ղեկավարի եւ քարտուղարի պաշտոններում առաջադրվել են համապատասխանաբար մշակույթի նախարար Լիլիթ Մակունցի եւ տրանսպորտի, կապի եւ ՏՏ փոխնախարար Դավիթ Սիմիդյանի թեկնածությունները:
Մեր աղբյուրի փոխանցմամբ՝ բոլոր առաջադրված թեկնածուներին էլ ապագա խմբակցության անդամները կողմ են քվեարկել: Տեղեկացանք, որ Ազգային ժողովի արտաքին հարբերությունների մշտական հանձնաժողովի նախագահը լինելու է արտաքին գործերի փոխնախարար Ռուբեն Ռուբինյանը:
Կառավարության կառուցվածքում տեղի ունեցող փոփոխությունների արդյունքում կրճատվելու է նաեւ սփյուռքի նախարարութունը, իսկ ահա նախարար Մխիթար Հայրապետյանը գործուղվելու է խորհրդարան: Նա էլ զբաղեցնելու է գիտության, կրթության, մշակույթի, երիտասարդության եւ սպորտի մշտական հանձնաժողովի նախագահի պաշտոնը:
Մեզ հայտնի դարձավ, որ նախնական քննարկումների արդյունքում որոշվել է, որ վարչապետի պաշտոնակատար Նիկոլ Փաշինյանի խորհրդական Վարազդատ Կարապետյանն առաջադրվելու է Ազգային ժողովի տարածքային կառավարման, տեղական ինքնակառավարման եւ գյուղատնտեսության եւ բնապահպանության հարցերի մշտական հանձնաժողովի նախագահի պաշտոնում:
Բաբկեն Թունյանը, որը մինչ պատգամավոր ընտրվելը զբաղվում էր տնտեսական լրագրությամբ, կառաջադրվի տնտեսական հարցերի մշտական հանձնաժողովի նախագահի պաշտոնում:
Մեր այս տեղեկությունների վերաբերյալ ՔՊ-ականները փոխանցեցին, որ առաջիկայում կուսակցությունը հայտարարությամբ հանդես կգա եւ կտրվեն բոլոր հարցերի պատասխանները:
7-րդ գումարման ԱԺ-ում պետական-իրավական եւ մարդու իրավունքների պաշտպանության հարցերի մշտական հանձնաժողովն առանձնանալու է, այսինքն՝ առանձին կգործի մարդու իրավունքների պաշտպանության հարցերի մշտական հանձնաժողով, իսկ դա էլ կնախագահի «Լուսավոր Հայաստան» խմբակցությունը: Սա կլինի միակ հանձնաժողովը, որը կնախագահի ԼՀԿ-ն:
Տեղեկացանք, որ ֆինանսավարկային եւ բյուջետային հարցերի մշտական հանձնաժողովն էլ բաժին է հասնելու ԲՀԿ-ին՝ մեկ այլ հանձնաժողովի հետ:
Ի դեպ, որոշվել է, որ «Իմ քայլը» խմբակցությունն Ազգային ժողովի առաջին նիստին ներկայացնելու է նախագիծ պետական-իրավական եւ մարդու իրավունքների պաշտպանության հարցերի մշտական հանձնաժողովն առանձնացնելու մասին:

Հայկ Վարդանյան