«Արդար չէր»․ Արցախի նախկին ՄԻՊ-ը՝ Սասուն Միքայելյանի հայտարարության ու Արցախի ՊՆ Լևոն Մնացականյանի հեռացման մասին. ՏԵՍԱՆՅՈՒԹ

Արցախի նախկին ՄԻՊ Ռուբեն Մելիքյանը Factor.am-ի հետ զրույցում տարակուսելի համարեց Արցախի պաշտպանության նախարար Լևոն Մնացականյանի հրաժարականի կապակցությամբ ՀՀ վարչապետի պաշտոնակատար Նիկոլ Փաշինյանի մեկնաբանությունը:

Նշենք, որ Նիկոլ Փաշինյանն այսօր ասաց՝ մեկնաբանությունը, թե Մնացականյանի հեռացումը կազդի բանակի մարտունակության վրա, «շատ վատ մեկնաբանություն է բանակի հասցեին», քանի որ նշանակվել են հնաբնակները:

«Գեներալ Լևոն Մնացականյանի մակարդակի մասնագետներ մենք շատ քիչ ունենք: Մենք պետք է շատ մեծ խնամքով վերաբերվենք այդ մասնագետներին»,- ասաց Մելիքյանը՝ հավելելով. «Կարծում եմ՝ անհամեմատելի է Լևոն Մնացականյանի և նոր նշանակված նախարարի առիթով հանրային ընկալումը Արցախում»:

Ըստ Մելիքյանի՝ պետք է հաշվի առնենք մեր ազգային ռեսուրսը. «Իսկ սա ազգային ռեսուրսի խնդիր է։ Այդպիսի զինվորական 1 տարվա, 10 տարվա ընթացքում չեն դառնում, և անգամ ժամանակի գործոնը չի էստեղ: Հսկայական փորձություններ՝ սկսած առաջին արցախյան պատերազմի, հետո ապրիլյան պարտերազմի ժամանակ, հետո բարձր մակարդակի կրթություն: Վստահ եմ, որ Արցախում շատ ոգևորված չէին»:

Ռուբեն Մելիքյանի կարծիքով՝ շատ ավելի անընդունելի ձևակերպումներ են թույլ տրվել Սասուն Միքայելյանի կողմից: «Սա խայտառակագույն վիրավորանք կարող էր դիտվել ցանկացած արցախցու կողմից»,- ասաց Մելիքյանը՝ ընդգծելով, որ իրեն չեն բավարարում Սասուն Միքայելյանի կիսաներողությունը և հնչեցված մեկնաբանությունները. «Դա նորմալ չի: Լևոն Մնացականյանն իմ հերոսն է, իսկ Սասուն Միքայելյանը իմ հերոսը չէ»:

Ըստ Արցախի նախկին ՄԻՊ-ի՝ Սասուն Միքայելյանի հայտարարությունն արձագանքի չարժանացնելն անընդունելի է, հատկապես, երբ գեներալ Մնացականյանի հայտարարությունը նման արձագանքի է արժանանում: «Արդար չէր այս ամեն ինչը»,- ասաց Ռուբեն Մելիքյանը:

Ինչ վերաբերում է հատկապես ՀՀ նախկին իշխանությունների կողմից շրջանառվող «տեղեկություններին», թե Նիկոլ Փաշինյանը պատրաստվում է Արցախում հողեր հանձնել, Մելիքյանն ասաց. «Նիկոլ Փաշինյանը Հայաստանի առաջին ղեկավարը չի, ում մասին նման հայտարարություններ են արվում: Նման հայտարարություններ արվել են թե՛ Սերժ Սարգսյանի վերաբերյալ, թե՛ Ռոբերտ Քոչարյանի, թե՛ Լևոն Տեր-Պետրոսյանի: Ես շատ բացասական եմ վերաբերվում նման խոսակցություններին: Ինքս ունեմ համոզմունք, որ Հայաստանի որևէ ղեկավար դավաճան չի և չի էլ կարող լինել»:

Ռուբեն Մելիքյանի հետ Factor.am-ի հարցազրույցի մանրամասները՝ տեսանյութում

Մարինե Խառատյան