«ՀՀ ԱԳՆ-ն պիտի հրավիրի Բելառուսի դեսպանին և բողոքի նոտա հղի, որ ձեր երկրի ղեկավարի բառապաշարն անընդունելի է». Արա Պապյան. ՏԵՍԱՆՅՈՒԹ

«Մոդուս Վիվենդի» վերլուծական կենտրոնի ղեկավար, դիվանագետ Արա Պապյանը Factor.am-ի հետ զրույցում ինքիշխանության կորուստ համարեց հայ-ռուսական նոր պայմանագրի մասին ՌԴ ԱԳ նախարար Սերգեյ Լավրովի հայտարարությունը:

Հիշեցնենք, որ Ռուսաստանի ԱԳ նախարար Սերգեյ Լավրովը «Կոմսոմոլսկայա պրավդային» տված հարցազրույցում հայտարարել է, որ Մոսկվան և Երևանը փաստաթուղթ են նախապատրաստում, որը պետք է երաշխավորի «օտարերկրյա զինվորականների բացակայությունը Հայաստանում»:

«Հասկանալի չէ՝ ինչո՞ւ մենք պետք է փաստաթուղթ ստորագրենք, որը վերաբերում է մեր ինքիշխանությանը»,- հարց ուղղեց Արա Պապյանը՝ հավելելով. «Ըստ էության, մենք պիտի որոշենք՝ ովքե՞ր կարող ենք Հայաստանում լինել կամ չլինել: Եթե այս ձևակերպումով լինի, սա ոտնձգություն է ՀՀ ինքիշխանության հանդեպ»:

Դիվանագետի խոսքով՝ ըստ տրամաբանության, ռուս զինվորականները ևս պետք է օտարերկրացի համարվեն. «Բայց վստահ եմ, որ բանակցվող փաստաթուղթը դա նկատի չունի: Իրենք նկատի ունեն բացի ռուսներից՝ այլ զինվորականների: Սա շատ անհասկանալի փաստաթուղթ է և լուրջ խնդիրներ է հարուցում և՛սահմանադրականության, և՛ միջազգային փաստաթղթերի առումով»:

Նշենք, որ այս պահի դրությամբ հայկական կողմը՝ ԱԳՆ-ն, ՊՆ-ն ու կառավարությունը, հստակ պարզաբանում չեն տվել, թե ինչ փաստաթղթի մասին է խոսքը: «Տպավորությունն այն է, որ մերոնք առանձնապես տեղյակ չեն՝ ինչ է տեղի ունենում»,- նկատեց Արա Պապյանը՝ հավելելով, որ շատ կարևոր է նաև պարզել՝ սա նախահեղափոխակա՞ն շրջանում սկսված բանակցություններ են, թե՞ հետհեղափոխական շրջանի:

«Եթե ստորագրվի այս ձևով, մեզ համար մեծ մարտահրավերներ կարող են լինել, որովհետև Ռուսաստանը դառնում է մեր տարածքի տնօրինողը»,- նշեց Պապյանը՝ հավելելով, որ այդ լաբորատորիաները վտանգ չեն ներկայացնում Ռուսաստանի համար և իրականում լծակ են Հայաստանի դեմ, քանի որ Մոսկվան մինչ այժմ արել է նման ոտնձգություններ և մտածում է՝ հիմա նույնպես սա շատ հանգիստ կանցնի: Ուստի՝ հայկական կողմը, ըստ դիվանագետի, պետք է հստակ և կոշտ պատասխան տա այս ամենին, քանի որ դրա ընդունումից հետո ՌԴ-ն կարող է առարկել ցանկացած զինվորականի ներկայությանը Հայաստանում:

Անդրադառնալով հարցին, որ լրագրողների հետ զրույցում Բելառուսի նախագահ Ալեքսանդր Լուկաշենկոն, կարելի է ասել, վիրավորել է Հայաստանի վարչապետին՝ հիշեցնելով, որ պետք է Ռուսաստանին քննադատել Ադրբեջանին զենք վաճառելու համար, Արա Պապյանն ասաց. «Եթե լիներ քաղաքակիրթ ձևաչափի մեջ, հարց չկար: Բայց էն բառապաշարը, որ ինքը օգտագործեց, և այն արհամարհական վերաբերմունքը, որ ցույց տվեց հանրային մեծ լսարանի առջև, սա է, որ ընդունելի չէ: Ընդունելի չէ այդ տոնով խոսել երկրի ղեկավարի հասցեին, որովհետև դու դրանով վիրավորում ես ամբողջ երկիրը»:

Ուստի, Պապյանի խոսքով՝ ՀՀ ԱԳՆ-ն պիտի հրավիրի Բելառուսի դեսպանին և բողոքի նոտա հղի, որի մեջ պիտի հստակ նշված լինի, որ Բելառուսի նախագահի բառապաշարն անընդունելի է, հարիր չէ երկկողմ հարաբերություններին, որովհետև մենք դաշնակից ենք, մի քանի կառույցների մեջ ենք:

«Դա պիտի անպայման արվի, պիտի թղթով ամրագրվի, որ մենք նեղացած ենք: Ես չեմ հիշում, որ էս տոնով որևէ մեկն արտահայտված լիներ մեր որևէ ղեկավարի հասցեին: Անգամ Իլհամ Ալիևը նման բան իրեն թույլ չի տվել: Երբ քեզ վիրավորում են, պիտի փորձես վիրավորանքին պատասխանել»,- եզրափակեց դիվանագետը:

Հարցազրույցի մանրամասները՝ տեսանյութում:

Մարինե Խառատյան