09.10.2026 | 23:47
Վրաստանում սպանության համար հետախուզվող է հայտնաբերվել. ՀՀ և Վրաստանի ՆԳՆ-ների համագործակցության արդյունքը
3-րդ սերնդի թղթադրամների բիզնեսն ebay-ում. Կենտրոնական բանկից դրանք ձեռք բերել հնարավոր չէ
Տնտեսություն
14.12.2018 | 17:26
Թեև օրեր առաջ՝ նոյեմբերի 22-ին, Կենտրոնական բանկը տարածեց հաղորդագրություն, որ նոր՝ 3-րդ սերնդի թղթադրամները շրջանառության մեջ են դրվել, սակայն պարզվում է, որ դա այդպես չէ և տասը հազար, քսան հազար և հիսուն հազար անվանական արժեքով թղթադրամները շարքային քաղաքացիները Կենտրոնական բանկից չեն կարողանում ձեռք բերել։
Պատճառը շատ պարզ է՝ դրանք ԿԲ-ում պարզապես չկան։
Պարզվում է, որ նոր թողարկված թղթադրամները չկան Կենտրոնական բանկում, բայց առկա են օնլայն վաճառք իրականացնող կայքերում, որտեղ դրանք վերավաճառվում են թանկ գներով․ ստացվում է՝ ոմանք դրամ առնել-ծախելով բավականին լուրջ գումարներ են վաստակում, իսկ հաշվի առնելով հանրության հետաքրքրությունը նոր` 3-րդ սերնդի թղթադրամների նկատմամբ, կարելի է ենթադրել, որ դրանք արագ վերավաճառվում են նաև օնլայն տիրույթում՝ զգալի եկամուտներ ապահովելով այդ գործի գիտակներին։
Մասնավորապես՝ ebay.com կայքում հայկական նոր թողարկված 10 000 դրամը կարելի է ձեռք բերել 37-38 ԱՄՆ դոլարով։
3-րդ սերնդի 20 000 հազարանոցը կարելի է ձեռք բերել 69-89 դոլարով։
Ի դեպ նշենք, որ ամենաշատը վերավաճառվում է հենց 20 000 դրամանոց հայկական թղթադրամը։
Թե ինչն է պատճառը, որ Կենտրոնական բանկից նոր թողարկված թղթադրամներ քաղաքացիները չեն կարողանում ձեռք բերել, ի՞նչ տպաքանակով են դրանք տպագրվել, ինչպե՞ս են դրանք հայտնվել օնլայն հարթակներում և ի՞նչ քայլեր է այս ուղղությամբ իրականացնում ՀՀ գլխավոր դրամատունը, Factor.am-ը փորձեց պարզել ԿԲ-ից։
Կենտրոնական բանկի հասարակայնության հետ կապերի ծառայությունից մեր հարցերը լսելուց հետո խոստացան պատասխանել կարճ ժամանակ անց, սակայն ավելի ուշ հայտնեցին, որ կպատասխանեն միայն պաշտոնական գրավոր հարցմանը։
Հարցումն ուղարկված է, և այն ստանալուն պես կներկայացնենք մեր ընթերցողներին։
Աղավնի Սուքիասյան
