01.10.2026 | 17:17
Նախկին ԱԳՆ շենքը կվերածվի բազմաֆունկցիոնալ համալիրի․ նախատեսվում է ավելի քան 150 մլն ԱՄՆ դոլարի ներդրում․ ԼՈՒՍԱՆԿԱՐՆԵՐ
Գարի Կասպարովը հայտարարել է, որ Լիտվայի և ԱՄՆ-ի հատուկ ծառայությունները նախազգուշացրել էին վտանգի մասին
Քաղաքականություն
01.10.2026 | 15:56
Շախմատիստ Գարի Կասպարովը պատմել է, որ Լիտվայի և ԱՄՆ-ի հատուկ ծառայություններն իրեն և «Ազատ Ռուսաստանի ֆորումի» համահիմնադիր Իվան Տյուրինին նախազգուշացրել են իրենց սպառնացող վտանգի մասին։ Ավելի վաղ իսպանական El Mundo-ն հայտնել էր, որ Ռուսաստանի իշխանությունների հետ կապ ունեցող ցանցը ծրագրել էր երեք ընդդիմադիրների սպանությունը։
«Ո՛չ ինձ, ո՛չ Իվանին ուղղակիորեն չեն ասել, որ հենց մենք ենք այն մարդիկ, որոնց անունները թաքցված են մահափորձի կատարողների դեմ ներկայացված մեղադրանքի նյութերում։ Սակայն Լիտվայի և ԱՄՆ-ի հատուկ ծառայությունները մեզ հայտնել են, որ մեր կյանքին վտանգ է սպառնում, և մենք պետք է նախազգուշական միջոցներ ձեռնարկենք»,- գրել է Կասպարովը։
Սեպտեմբերին ԱՄՆ Հետաքննությունների դաշնային բյուրոն և այլ գերատեսչություններ հայտնել էին Ռուսաստանի հետ կապվող մի ցանցի բացահայտման մասին։ Ըստ ամերիկյան կողմի՝ ցանցում ընդգրկված են եղել ռուսական հատուկ ծառայությունների 63-ամյա նախկին գնդապետ Յուրի Խրամեևը, 27-ամյա ԱԴԾ-ի սպա Կիրիլ Խրամեևը՝ Յուրի Խրամեևի որդին, Ռուսաստանում բնակվող Կուբայի քաղաքացի Օեմիս Ռոմագոսա Դուրրուտին, Կուբայի քաղաքացի Յաիդել Դելգադո Սուարեսը և Վենեսուելայի քաղաքացի Անխել Էդուարդո Կաստրոն։
ԱՄՆ Արդարադատության նախարարության տվյալներով՝ նրանք մարդկանց էին հավաքագրում ԱՄՆ-ում երկու, իսկ Լիտվայում՝ մեկ անձի նկատմամբ հսկողություն իրականացնելու և նրանց սպանելու համար։
El Mundo-ի տվյալներով՝ մահափորձ էր ծրագրվել հիմնականում ԱՄՆ-ում բնակվող Գարի Կասպարովի, նրա համախոհ՝ Լիտվայում բնակվող Իվան Տյուրինի, ինչպես նաև Պետդումայի նախկին պատգամավոր Իլյա Պոնոմարյովի դեմ, որը բնակվում է երկու քաղաքում՝ Կիևում և Վաշինգտոնում։ Պոնոմարյովը El Mundo-ի հրապարակումը չի մեկնաբանել, սակայն BBC-ի աղբյուրը, որը մոտ է քաղաքական գործչին, հայտարարել է, որ «սա արդեն մահափորձի իններորդ փորձն է»։
Թարգմանությունը՝ Էմմա Չոբանյանի
