Իսկ մեր հեռարձակած համերգների բոլո՞ր օրերին է, որ տասնյակ զոհեր չենք ունեցել. Փաշինյան․ ՏԵՍԱՆՅՈՒԹ

Վարչապետ Նիկոլ Փաշինյանը լրագրողների հետ ճեպազրույցի ընթացքում անդրադարձավ 44-օրյա պատերազմի տարելիցին պաշտոնական ուղերձների բացակայությանը, Հանրային հեռուստատեսությամբ համերգների հեռարձակման շուրջ դժգոհություններին և պետական տոնացույցի տրամաբանությանը։

Խոսելով 44-օրյա պատերազմին անդրադառնալու մասին՝ վարչապետը նշեց, որ արդեն հինգ տարի անընդհատ խոսել է այդ թեմայով՝ Ազգային ժողովի ելույթներում և քննիչ հանձնաժողովում, և այլևս չկա որևէ նրբություն, որի մասին չի խոսվել։

«Ես նոր բան չունեմ ասելու 44-օրյա պատերազմի մասին․ երբ որ նոր բան ունենամ ասելու, կասեմ այդ ասելիքը»,- հայտարարեց նա։

Անդրադառնալով հիշատակի օրերի սահմանմանը՝ Նիկոլ Փաշինյանը պարզաբանեց, որ Հայրենիքի համար զոհվածների հիշատակի հատուկ օր է սահմանվել, որպեսզի տարբերակված վերաբերմունք չլինի տարբեր պատերազմներում զոհվածների միջև։ Նա ընդգծեց, որ սեպտեմբերի 13-ի կամ Ապրիլյան պատերազմի հետ կապված ևս հատուկ ուղերձներ չեն եղել, ինչը երբեմն դժգոհություն է առաջացրել զոհվածների հարազատների շրջանում։

Մեկնաբանելով սեպտեմբերի 27-ին համերգների հեռարձակման շուրջ հանրային արձագանքը՝ վարչապետը նշեց, որ այդտեղ առկա է անպատեհություն, սակայն հավելել է, որ Հայաստանի պատմությունը լի է ողբերգական էջերով։

«Պրոբլեմն այն է, որ մեր պատմությունը շատ ողբերգական օրեր ունի, և կարող է պարզվել, որ մեր բոլոր շաբաթ-կիրակիները, և ընդհանրապես, եթե մենք մեր պատմությանն առերեսվենք, 365 օրերը մեծ ողբերգություններով նշանավորված են»,- նշեց Նիկոլ Փաշինյանը։

Ըստ վարչապետի՝ հենց այդ պատճառով սահմանվել են պետական տոներն ու հիշատակի օրերը, որոնք պետք է ծառայեն որպես ուղեցույց։

Մանրամասները՝ տեսանյութում։

Եվգենյա Համբարձումյան