ՌԴ-ն սպառնում է միջուկային զենք օգտագործել Կալինինգրադի շրջափակման դեպքում

Եթե ՆԱՏՕ-ի երկրները փորձեն մեկուսացնել Կալինինգրադի մարզը, Ռուսաստանը պատրաստ կլինի օգտագործել իր ամբողջ զինանոցը, այդ թվում՝ միջուկային զենքը։ Այս մասին հաղորդագրություն է հրապարակել Իռլանդիայում Ռուսաստանի դեսպանատան մամուլի ծառայությունը, գրում է Կոմերսանտը։

«Անպատասխանատու և անհեռատես եվրոպական քաղաքական վերնախավը վտանգավոր խաղ է վարում։ Ռուսաստանի արտաքին գործերի նախարար Սերգեյ Լավրովը վերջերս հայտարարել է, որ եթե Արևմուտքը հարձակվի մեզ վրա, մենք կպատասխանենք, և դա կլինի բոլորովին այլ պատերազմ, և շատ կարճ»,- ասվում է հաղորդագրության մեջ։

Դեսպանատանը հայտարարել են, որ Եվրամիությունն ու ՆԱՏՕ-ն ռազմական ակտիվությունն ավելացնում են Ռուսաստանի ամբողջ արևմտյան սահմանով։ Դաշինքի անդամները շարունակաբար ռազմական զորավարժություններ են անցկացնում և միանում են «առաջնային զսպման» նախաձեռնություններին, որոնք նախատեսում են ֆրանսիական միջուկային զենքի տեղակայում ռուսական  սահմանների մոտ։

Նշվել է նաև Կալինինգրադի մարզի օդային և ծովային շրջափակման նախապատրաստման վերաբերյալ ստացվող տեղեկությունների մասին։

«Նման սցենարի դեպքում զինված բախման ռիսկը բարձր է, ընդ որում՝ հակամարտության արդեն վաղ փուլում Ռուսաստանի կողմից Դաշինքի անդամ երկրների որոշումների կայացման կենտրոններին կանխարգելիչ հարվածներ հասցնելու հավանականությամբ»,- հայտարարել են դիվանագիտական ներկայացուցչությունում։

Միևնույն ժամանակ, գերատեսչությունում հայտարարել են, թե Ռուսաստանը «Եվրոպայի հետ իրավիճակը սրելու որևէ ծրագիր, որևէ պատճառ և որևէ իրական շարժառիթ չունի», և կոչ են արել եվրոպական երկրներին այս հարցին առավելագույն լրջությամբ վերաբերվել։

Թարգմանությունը՝ Էմմա Չոբանյանի