Լռության օրը Թումանյանի համայնքապետարանի էջը տարածել է համայնքի ղեկավարի մասնակցությամբ տեսանյութ

Լոռու մարզի Թումանյանի համայնքապետարանի պաշտոնական էջը տարածել է մարզպետ Արեն Մկրտչյանի երեկ հրապարակած տեսանյութը, որում համայնքի ղեկավար Սուրեն Թումանյանը ներկայացնում է Դսեղում իրականացված աշխատանքներն ու ծրագրերը՝ խոսելով կատարված աշխատանքների և դրանց վերաբերյալ տվյալների մասին։

Վաղը՝ սեպտեմբերի 27-ին, Թումանյան համայնքում ավագանու ընտրություններ են։ Սուրեն Թումանյանը «Քաղաքացիական պայմանագիր» կուսակցության ավագանու թեկնածուների ցուցակը գլխավորողն է։
Ընտրական օրենսգրքով քվեարկության նախորդ օրը և քվեարկության օրը նախընտրական քարոզչությունն արգելվում է։ Միաժամանակ, օրենսգրքի 23-րդ հոդվածն արգելում է քարոզչության նպատակով վարչական ռեսուրսի, այդ թվում՝ ծառայողական պարտականությունների համար տրամադրված տեղեկատվական միջոցների օգտագործումը։
Այս դեպքում համայնքապետարանի պաշտոնական տեղեկատվական հարթակն օգտագործվել է համայնքում կատարված աշխատանքները գործող համայնքապետի կողմից ներկայացնող տեսանյութ տարածելու համար։

Թումանյան համայնքում ավագանու ընտրություններին մասնակցում է միայն «Քաղաքացիական պայմանագիր» կուսակցությունը։ Քվեաթերթիկում ընտրողներին առաջարկվելու է «կողմ եմ» կամ «դեմ եմ» տարբերակը։

Սուրեն Թումանյանը նախկինում համայնքի ղեկավար է ընտրվել «Հանրապետություն» կուսակցության ցուցակով։ Նա Factor.am-ին հետ զրույցում հաստատել է, որ դուրս է եկել կուսակցությունից և այժմ «Քաղաքացիական պայմանագիր» կուսակցության անդամ է։

Անի Թամրազյան