Զելենսկին ներկայացրել է Վաշինգտոնի կողմից առաջարկվող ապէսկալացիայի երեք կետերը

ԱՄՆ նախագահ Դոնալդ Թրամփի վարչակազմը պնդում է երեք անհետաձգելի քայլերի իրականացման հարցում՝ Ռուսաստանի և Ուկրաինայի միջև պատերազմում ապաէսկալացիայի և Մոսկվայի հետ դիվանագիտական հարաբերությունների վերականգնմանն ուղղված ջանքերի շրջանակում։ ՌԲԿ-Ուկրաինայի հաղորդմամբ՝ այս մասին Ուկրաինայի նախագահ Վլադիմիր Զելենսկին պատմել է Axios-ին տված հարցազրույցում։

Ըստ Զելենսկիի՝ խոսքը հետևյալ քայլերի մասին է՝

• էներգետիկ ենթակառուցվածքների նկատմամբ հարվածների դադարեցում՝ հրադադար,
• Սև ծովում «հացահատիկային միջանցքի» գործունեության վերականգնում,
• ԱՄՆ-Ուկրաինա-Ռուսաստան եռակողմ հանդիպում, որը, ենթադրաբար, կանցկացվի Աբու Դաբիում։

Նա նշել է, որ էներգետիկ ենթակառուցվածքներին ուղղված հարվածների համատեղ դադարեցման առաջարկը ստացվել է ԱՄՆ-ից, և Ուկրաինան պատրաստ է համաձայնել դրան։

«Այժմ օրակարգում է առաջարկը՝ էներգետիկ հրադադար։ Մենք պատրաստ ենք»,- նշել է Զելենսկին։

Նա նաև հավելել է, որ ԱՄՆ-ը ձգտում է կրկին բացել «հացահատիկային միջանցքը» և անցկացնել եռակողմ հանդիպում։

ԱՄՆ-ն առաջարկել է նախ անցկացնել տեխնիկական խմբերի հանդիպում, այլ ոչ թե հանդիպում առաջնորդների մակարդակով։ Հնարավոր վայրերից մեկը նրանք առաջարկել են Աբու Դաբին։

«Մենք բաց ենք առաջարկների համար՝ ցանկացած երկիր, ցանկացած ձևաչափ»,- ընդգծել է Ուկրաինայի նախագահը։

Հիշեցնենք, որ սեպտեմբերի 22-ին Ուկրաինայի նախագահ Վլադիմիր Զելենսկին Նյու Յորքում՝ ՄԱԿ-ի Գլխավոր վեհաժողովի շրջանակում, հանդիպել էր ԱՄՆ նախագահ Դոնալդ Թրամփի հետ։

Թարգմանությունը՝ Էմմա Չոբանյանի