13.10.2026 | 21:17
Թալիբները դադարեցրել են BBC-ի ռադիոհեռարձակումը Աֆղանստանում
Յոթ կալանավոր հացադուլ է հայտարարել. նրանցից երկուսը 28-րդ օրն է՝ առանց սննդի են
Հասարակություն
23.09.2026 | 19:10
«Արմավիր», «Նուբարաշեն» և «Արթիկ» ՔԿՀ-ներում այս պահին հացադուլ է իրականացնում յոթ կալանավոր, նրանցից երկուսն արդեն 28-րդ օրն է՝ հացադուլի մեջ են։ Այս մասին Factor TV-ի գրավոր հարցմանն ի պատասխան հայտնում են Քրեակատարողական ծառայությունից։
Մյուս հինգ կալանավորներից երկուսի մոտ այսօր հացադուլի 23-րդ օրն էլ, մեկի մոտ՝ 10-րդ օրը, երկուսի մոտ՝ 6-րդ օրը։
Ըստ պաշտոնական պատասխանի՝ կալանավորներից 6-ը նման ծայրահեղ քայլի են դիմել իրենց քրեական գործի հետ անհամաձայնության պատճառով, մեկը՝ այս եղանակով բարձրաձայնել իր առողջական խնդիրների մասին։ Ստացվում է, կալանավորն արդեն իսկ վատառողջ է, իսկ հացադուլը, հնարավոր է, ավելի վատ ազդեցություն ունենա նրա առողջության վրա։
Անձնական տվյալների պաշտպանությունը կարևորելով՝ Քրեակատարողական ծառայությունը չի տրամադրել հացադուլ հայտարարած կալանավորների անունները, ինչպես նաև այլ տվյալներ, որպեսզի հնարավոր չլինի անազատության մեջ գտնվող անձանց նույնականացնել։ Հենց այս պատճառով FactorTV-ն չկարողացավ ծանոթանալով կալանավորների քրեական գործերին։
Իսկ ի՞նչ առողջական վիճակում են գտնվում հացադուլ հայտարարած կալանավորները, հաշվի առնելով այն հանգամանքը, որ նրանցից երկուսը տևական ժամանակ է առանց սննդի է։ Ծառայությունն այս հարցին ևս չի պատասխանում, նշելով, որ առողջական հարցերը «Քրեակատարողական բժշկության կենտրոն» ՊՈԱԿ-ի տիրույթում են գտնվում։
ՊՈԱԿ-ից, սակայն, ևս տվյալներ և անձի առողջական վիճակի մասին հստակ տեղեկատվություն չեն տրամադրում՝ բժշկականի գաղտնիքին հղում կատարելով։ Ավելի վաղ «Քրեակատարողական բժշկության կենտրոն» ՊՈԱԿ-ի բժշկական օգնության կազմակերպման բաժնի պետ Նաիրա Բաբայանը Factor TV-ի հետ զրույցում հավաստիացրել էր, որ հացադուլ հայտարարած բոլոր անձինք պատշաճ հսկողության տակ են.
«Բոլոր քրեակատարողական հիմնարկներում հացադուլի մեջ գտնվող անձինք, բոլոր ժամանակներում իրենց հացադուլի ընթացքում գտնվում են մշտական 24-ժամյա հսկողության տակ՝ բուժանձնակազմի կողմից։ Ու իրենց համար ցանկացած պահի, երբ որ կարիքը լինի, առողջական վիճակով պայմանավորված շտապօգնության կանչ է տրվում, եթե չի տրվել, նշանակում է՝ այդ պահի դրությամբ տվյալ անձի առողջական վիճակի գնահատումը շտապօգնության կանչի ցուցում չի ենթադրել։ Այսինքն, բոլորը գտնվում են բուժանձնակազմի հսկողության տակ՝ դինամիկ, հեմոդինամիկ տվյալների չափումներով, կշռումներով և այլն, օբյեկտիվ զննումների արդյունքում բուժանձնակազմը պետք է գտնի, որ կարիք կա շտապօգնության կանչի։ Մենք ինքներս լիցենզավորված, հավաստագրված բուժօգնություն տրամադրող կազմակերպություն ենք, ունենք բժիշկներ, բուժքույրեր, դեղորայք՝ ամեն ինչ պատշաճ բուժօգնություն տրամադրելու համար»։
Ռոզա Վարդանյան
