22.09.2026 | 19:39
Պուտինն ու Էրդողանը քննարկել են Սև ծովում նավերի վրա հարձակումների դադարեցման հարցը․ Կրեմլ
Վաղարշապատի կինոթատրոնի շենքը 55 հազար դոլարով օտարելու գործարքի վերաբերյալ քրեական վարույթ է նախաձեռնվել
Հասարակություն
22.09.2026 | 18:44
Դատախազության ուսումնասիրությամբ պարզվել է, որ Վաղարշապատի Կոմիտասի հրապարակում գտնվող պետական կինոթատրոնի շենքը 2004 թվականին առանց սահմանված կարգով գնահատման ուղղակի վաճառքով օտարվել է ֆիզիկական անձի՝ 55 հազար դոլարին համարժեք դրամով, մինչդեռ երեք ամիս անց դրա կադաստրային արժեքը կազմել է 218.2 մլն դրամ։ Ուսումնասիրությամբ արձանագրվել են նաև կից 0.266 հա հողամասի նկատմամբ իրավունքի փոխանցման հնարավոր խախտումներ։ Դեպքի առթիվ նախաձեռնվել է քրեական վարույթ, իսկ Դատախազությունը պետշահերի հայց է ներկայացրել դատարան։
Դատախազության հաղորդագրությունը՝ ստորև․
Զինվորական կենտրոնական դատախազության պետական շահերի պաշտպանության բաժնի կողմից ուսումնասիրվել է Վաղարշապատ համայնքի Կոմիտասի հրապարակում գտնվող կինոթատրոնի շենքի և դրան կից հողամասի օտարման գործընթացի իրավաչափությունը:
Ուսումնասիրության արդյունքում պարզվել է, որ ՀՀ պաշտպանության նախարարի զեկուցմամբ, առանց սահմանված կարգով իրականացված գույքի գնահատման արդյունքի՝ Կառավարության 2004 թվականի մարտի 11-ի թիվ 282-Ա որոշմամբ թույլատրվել է պետական սեփականություն հանդիսացող կինոթատրոնի շենքն ուղղակի վաճառքով օտարել ֆիզիկական անձին՝ վաճառքի գինը սահմանելով 55 հազար ԱՄՆ դոլարին համարժեք դրամ, այն դեպքում, երբ օտարումից շուրջ երեք ամիս անց, առանց փաստացի վիճակի փոփոխության, վերոնշյալ գույքի կադաստրային արժեքը կազմել է 218 միլիոն 215 հազար դրամ։
Ուսումնասիրությամբ պարզվել է նաև, որ առուվաճառքի պայմանագրով հողամասի վարձակալության իրավունքի փոխանցում նախատեսված չլինելու պայմաններում՝ պետական սեփականություն հանդիսացող 0,266 հա մակերեսով հողամասի նկատմամբ գրանցվել է ֆիզիկական անձի վարձակալության իրավունքը, որը հետագայում հիմք է հանդիսացել նրա կողմից 18 միլիոն 513 հազար դրամ կադաստրային արժեքով հողամասի նկատմամբ անհատույց սեփականության իրավունք ձեռք բերելու համար։
Պարզվել է նաև, որ 0,266 հա մակերեսով հողամասից 1253 քմ մակերեսով հատվածը՝ մայթերն ու անցումները, գտնվել են Հողային օրենսգրքի 60-րդ հոդվածով սահմանված սահմանափակումների տիրույթում և ենթակա չեն եղել օտարման։
Դատախազը, պետական շահերի պաշտպանության լիազորություններն իրականացնելու շրջանակում հայտնաբերելով առերևույթ հանցանքի հատկանիշներ, հանցանքի մասին հաղորդում է ներկայացրել Հակակոռուպցիոն կոմիտե, նախաձեռնվել է քրեական վարույթ։
Դատախազության կողմից պետական շահերի պաշտպանության հայց է ներկայացվել դատարան, որն ընդունվել է վարույթ։
