Շոյգուն հայտարարել է, թե ՀՀ-ում ՌԴ ներդրումներով ընկերությունների նկատմամբ, իբր, «ռեյդերային զավթում» է իրականացվում

ՌԴ Անվտանգության խորհրդի քարտուղար Սերգեյ Շոյգուն, թե Հայաստանում ձեռնարկությունների նկատմամբ, որոնցում Ռուսաստանը միլիարդավոր ներդրումներ է կատարել, «ռեյդերային զավթում» է իրականացվում, գրում է ՏԱՍՍ-ը։

«Հայաստանում աշխատող ռուսական բիզնեսի նկատմամբ ոչ բարեկամական գիծ ու բացահայտ «երկակի ստանդարտներ» են դրսևորվում։ Այն, ինչ տեղի է ունենում ձեռնարկությունների և ամբողջական ոլորտների հետ, որոնցում Ռուսաստանը միլիարդավոր ներդրումներ է կատարել, այլ կերպ, քան «ռեյդերային զավթում», դժվար է անվանել»,- հայտարարել է նա Անվտանգության խորհրդի գիտափորձագիտական խորհրդի նախագահության անդամների նիստում։

Միաժամանակ, նրա բնորոշմամբ, առաջ են քաշվում «բացահայտ անհեթեթ փաստարկներ»․ «Օրինակ՝ այն, որ Հայաստանը հայկական երկաթուղիների՝ Ռուսաստանի կողմից կառավարման շարունակության դեպքում Հայաստանը կորցնում է միջազգային երկաթուղային ցանցերին ինտեգրվելու հնարավորությունները»։

Նա նաև նշել է, թե Հայաստանի իշխանությունները, իբր, Ռուսաստանի հետ կապերը խզելու և Արևմուտքի հետ համագործակցությունն ամրապնդելու կուրս են որդեգրել։

«Ամենացուցադրական իրավիճակը ստեղծվել է Հայաստանի հետ։ Հիշեցնեմ, որ 1990-ականներին Ռուսաստանը փրկել է այդ երկիրը տնտեսական և էներգետիկ կոլապսից, իսկ ԵՏՄ-ին անդամակցության տասը տարիների ընթացքում նրա տնտեսությունն աճել է գրեթե երեք անգամ։ Միաժամանակ, ներկայիս իշխանությունները Ռուսաստանի հետ կապերը խզելու և Արևմուտքի հետ համագործակցությունն ամրապնդելու ուղի են որդեգրել։ Ակնհայտ է Երևանի՝ ՆԱՏՕ-ի հետ համագործակցությունն ընդլայնելու ձգտումը և տարածաշրջանային ինտեգրման մեխանիզմների, առաջին հերթին՝ ԵՏՄ-ի և ՀԱՊԿ-ի նկատմամբ բացահայտ սպառողական վերաբերմունքը»,- հայտարարել է նա։

Ըստ Շոյգուի՝ Ռուսաստանը չի ֆինանսավորելու Հայաստանի եվրաինտեգրումը։

«Ռուսաստանի Դաշնության նախագահ Վլադիմիր Վլադիմիրի Պուտինը միանգամայն հստակ է ներկայացրել մեր վերաբերմունքն այս հարցի վերաբերյալ․ Երևանը պետք է կողմնորոշվի իր կուրսի հարցում և հանրաքվե անցկացնի ԵՄ-ին անդամակցելու կամ ԵՏՄ-ում մնալու վերաբերյալ։ Ցանկանում եմ ընդգծել՝ Ռուսաստանը պատրաստ չէ և չի ֆինանսավորելու Հայաստանի եվրաինտեգրումը, և այդ ուղղությամբ յուրաքանչյուր քայլ օբյեկտիվ հետևանքներ է ունենալու»,- ասել է ՌԴ ԱԽ քարտուղարը։

Հիշեցնենք, որ նախօրերին էլ ՌԴ ԱԳ նախարար Սերգեյ Լավրովը հայտարարել էր, թե Եվրամիության իշխանությունները, ամենայն հավանականությամբ, կխաբեն Հայաստանին եվրաինտեգրման հարցում։

Թարգմանությունը՝ Էմմա Չոբանյանի