06.11.2026 | 01:59
Եվրոպա լիգա. «Արարատ-Արմենիան» ցավալի պարտություն կրեց Պորտուգալիայում. ՏԵՍԱՆՅՈՒԹ
Քաղաքացիները կարող են իրենց եկամտային հարկից գումար հատկացնել ՀԿ-ներին, ԶԼՄ-ներին ու կուսակցություններին․ նախագիծը Կառավարության նիստի օրակարգում է
Հասարակություն
17.09.2026 | 10:38
Այսօր Կառավարության նիստում քննարկվելու է Հարկային օրենսգրքում փոփոխություններ կատարելու նախագիծ, որով առաջարկվում է քաղաքացիներին հնարավորություն տալ իրենց վճարած եկամտային հարկի հաշվին գումար հատկացնել հասարակական կազմակերպություններին, լրատվական գործունեություն իրականացնող իրավաբանական անձանց և անհատ ձեռնարկատերերին, ինչպես նաև կուսակցություններին։
Նախագծով այդ հատկացումները ներառվում են սոցիալական ծախսերի շարքում։ Գործող կարգավորումներով սոցիալական ծախսերի շրջանակում ներառված են առողջապահության, կրթության և բնակարանային ապահովության համար քաղաքացիների կատարած ծախսերը։
Նոր կարգավորմամբ քաղաքացին կարող է իր եկամտային հարկի հաշվին անհատույց գումար հատկացնել, օրինակ, որևէ լրատվամիջոցի, հասարակական կազմակերպության կամ կուսակցության։
Թե որքան գումար կարող է հատկացվել և որ կազմակերպությունները, լրատվամիջոցներն ու կուսակցությունները կարող են օգտվել այս մեխանիզմից, սահմանելու է Կառավարությունը։
Կառավարությունը պետք է սահմանի նաև համապատասխան չափանիշները, հարկային մարմնին ներկայացվող տեղեկությունների ցանկն ու դրանց հրապարակման կարգը, ինչպես նաև սոցիալական ծախսերի փաստաթղթավորման կարգը։
Նախագծի համաձայն՝ նոր կարգավորումը կիրառվելու է 2026 թվականի և դրան հաջորդող հարկային տարիների համար հաշվարկված և վճարված եկամտային հարկի գումարների հաշվին կատարվող հատկացումների նկատմամբ։
Օրենքն ուժի մեջ կմտնի պաշտոնական հրապարակմանը հաջորդող օրվանից, իսկ դրանից բխող ենթաօրենսդրական ակտերը պետք է ընդունվեն օրենքի ընդունումից հետո՝ երեք ամսվա ընթացքում։
Նարեկ Կիրակոսյան
