06.11.2026 | 01:59
Եվրոպա լիգա. «Արարատ-Արմենիան» ցավալի պարտություն կրեց Պորտուգալիայում. ՏԵՍԱՆՅՈՒԹ
Աշխատակիցներին սպառնում են աշխատանքից ազատել քաղաքական հայացքների պատճառով. «Անկախ դիտորդ»-ը ահազանգում է
Հասարակություն
16.09.2026 | 20:06
«Անկախ դիտորդ» հասարակական դաշինքը ահազանգում է, որ որոշ գործատուներ աշխատակիցներին աշխատանքից ազատում կամ նման քայլով սպառնում են նրանց քաղաքական հայացքների, կուսակցական պատկանելիության կամ ընտրական գործընթացներին մասնակցելու պատճառով։ Դաշինքը հիշեցնում է, որ նման դրսևորումները կարող են հանգեցնել աշխատանքային իրավունքների խախտման և քրեական պատասխանատվության։
«Խտրականության այս դրսևորումը հանգեցնում է աշխատանքային իրավունքների խախտման, ինչպես նաև ՀՀ քրեական օրենսգրքի 210, 211 հոդվածների համատեքստում ենթադրում է քրեական պատասխանատվություն:
Ոչ ոք իրավունք չունի հարկադրել աշխատակցին իր աշխատանքային պայմանագրով չնախատեսված աշխատանքներ կատարել ընտրություններին մասնակցող որևէ կուսակցության օգտին կամ դեմ, ինչպես նաև խտրական վերաբերմունք ցուցաբերել նման պահանջը մերժելու կամ քաղաքական իրավունքները օրենքի շրջանակներում իրագործելու դեպքում։
Աշխատողն անպաշտպան չէ, երբ չի լռում։
ՀՔԱ Վանաձորի գրասենյակը (ՀՔԱՎ) 2023 թվականին ունեցել է հաջողված փորձ, երբ քաղաքական դրդապատճառներով աշխատանքից ազատված համայնքային ենթակայության մի շարք աշխատակիցներ ՀՔԱՎ-ի իրավաբանական աջակցության շնորհիվ վերականգնել են իրենց աշխատանքային իրավունքները։ Նշված գործին կարող եք ծանոթանալ այստեղ:
Եթե Դուք կամ Ձեր ծանոթները բախվել եք նմանատիպ խնդրի, hորդորում ենք անմիջապես կապ հաստատել մեզ հետ։ Մեր իրավաբանական թիմը պատրաստ է անվճար իրավախորհրդատվություն և աջակցություն տրամադրել բոլոր քաղաքացիներին»,- ասվում է հաղորդագրությունում
