Քաղաքականություն
16.09.2026 | 19:36Ազգային ժողովում կառավարության հետ հարցուպատասխանի ընթացքում «Ուժեղ Հայաստան» խմբակցության պատգամավոր Արեգա Հովսեփյանը բարձրացրեց արցախցիների և մարզերից Երևան տեղափոխված ուսանողների բնակարանային վարձերի կտրուկ թանկացման խնդիրը։
Պատգամավորը միացրեց անօթևան մնացած արցախցի ընտանիքի ձայնագրությունը, որոնք, ըստ նրա, ստիպված են եղել տեղափոխվել Երևանում Արցախի ներկայացուցչության շենք, և իշխանություններից պահանջեց գործուն լուծումներ գտնել բնակվարձերի աճի խնդրին։
Ի պատասխան՝ վարչապետ Նիկոլ Փաշինյանը հայտարարեց, որ ինքնակամ որևէ շենք մտնելն անթույլատրելի է, իսկ Հայաստանում երկրորդ պետական կառույց կամ կառավարություն լինել չի կարող։ Նրա խոսքով՝ Արցախի ներկայացուցչության շենքը պետք է անցնի ՀՀ տնօրինությանը։
Անդրադառնալով բնակարանային խնդրին՝ Փաշինյանը նշեց, որ կառավարությունը 800 միլիարդ դրամ է հատկացրել բռնի տեղահանվածների բնակարանային ապահովման համար՝ ընդգծելով, որ բնակարաններ կան նաև Հայաստանի մարզերում, ոչ միայն Երևանի կենտրոնում։
Երբ պատգամավորը առաջարկեց անօթևան ընտանիքներին տեղավորել կառավարական առանձնատներում, Փաշինյանը հակադարձեց.
«Բա ինչի՞ է, որ դուք, Ղարաբաղից լինելով, Երևանում երկու սենյականոց բնակարան ունեք, իսկ մյուս 100 000-ը չունի: Ի՞նչն է դրա պատճառը: Ղարաբաղի նախկին ղեկավարների շենքերը տվեք, թող մարդիկ ապրեն: Տասնյակ շենքեր ու հյուրանոցներ ունեն Երևանում, տվե՛ք՝ թող ապրեն: Պետությունն իր գույքով վճարելու կարիք չունի, 800 միլիարդ դրամ հատկացում է արված, թող մարդիկ օգտվեն այդ ծրագրերից»։
Մանրամասները՝ տեսանյութում:
Անի Թամրազյան
