06.11.2026 | 14:11
Հայաստանում սպասվում է անձրև և ձյուն․ ջերմաստիճանը կնվազի
ՀՀ քննչական կոմիտեի և ՉԺՀ հանրային անվտանգության նախարարության միջև ստորագրվել է փոխըմբռնման հուշագիր
Հասարակություն
11.09.2026 | 11:54
2026 թվականի սեպտեմբերի 10-ին Լիանյունգանգ քաղաքում Հայաստանի Հանրապետության քննչական կոմիտեի և Չինաստանի Ժողովրդական Հանրապետության հանրային անվտանգության նախարարության միջև ստորագրվել է փոխըմբռնման հուշագիր:
Փաստաթղթի ստորագրման շուրջ պայմանավորվածությունը ձեռք էր բերվել դեռևս մեկ տարի առաջ՝ ՀՀ քննչական կոմիտեի նախագահի՝ ՉԺՀ կատարած պաշտոնական այցի ընթացքում, որի շրջանակում Արթուր Պողոսյանը հանդիպել էր Հանրային անվտանգության նախարար Վան Սյաոհոնին:
Հուշագրի ստորագրմամբ կողմերը նպատակ ունեն ընդլայնել իրավական գործակցությունը անդրազգային կազմակերպված հանցավորության դեմ պայքարում, ապահովել փոխադարձ աջակցություն հանցագործությունների վերաբերյալ ստացված տեղեկությունների ստուգման և քրեական վարույթների քննության ընթացքում, իրականացնել փորձի ու տեղեկատվության փոխանակում ահաբեկչական, տնտեսական, տեղեկատվական և հաղորդակցական տեխնոլոգիաների ոլորտում կատարվող, անդրազգային կազմակերպված ու հասարակության համար լուրջ վտանգ ներկայացնող այլ հանցագործությունների քննության մեթոդաբանության վերաբերյալ:
Փաստաթուղթը նաև միտված է զարգացնելու աշխատակիցների մասնագիտական կարողությունները համատեղ կրթական ծրագրերի, վերապատրաստումների, փոխադարձ այցերի և միմյանց գիտահետազոտական ու ուսումնական հաստատություններում անձնակազմի փոխանակման միջոցով՝ անցկացնելով պարբերական փորձագիտական խորհրդակցություններ ու գիտագործնական միջոցառումներ երկուստեք հետաքրքրություն ներկայացնող հարցերի շուրջ:
Պաշտոնական այցի ավարտին ՀՀ քննչական կոմիտեի նախագահը և ՉԺՀ հանրային անվտանգության նախարարը բարձր են գնահատել ձևավորված գործընկերային հարաբերությունների դինամիկան և վստահություն հայտնել, որ հուշագրի դրույթների գործնական կիրառումը որակական նոր մակարդակի կբարձրացնի երկու երկրների իրավապահ գերատեսչությունների փոխգործակցության արդյունավետությունը:
