01.11.2026 | 21:56
Լրագրողներն այցելել են բանակային դիրք ու ամրացված շրջան, հանդիպել Սուրեն Պապիկյանի հետ
Գնդապետի պաշտոնանկություն՝ զինվորի մահից 22 օր անց․ ինչ են ակնկալում 19-ամյա տղայի հարազատները. ՏԵՍԱՆՅՈՒԹ
Քաղաքականություն
10.09.2026 | 19:30
Ողբերգական վրաերթից 3 շաբաթ անց պաշտոնանակ է արվել Ճամբարակի զորամասի հրամանատար, գնդապետ Դալլաքյանը։ Ճամբարակ-Վահան ճանապարհին տեղի ունեցած պատահարի հետևանքով մեկ զինծառայող էր զոհվել, 6-ը՝ վիրավորվել։ Որդեկորույս ընտանիքը պաշտոնանկության մասին իմացել է մամուլից։
«Ոչ մի պաշտոնյա դեռ չի եկել, չի խոսել, միայն լուրերով է իր ընտանիքը ծանոթանում դեպքի մանրամասներին, համացանցից են տեղեկանում դեպքի մանրամասներին, ոչ ոք ոչ մի պարզաբանում չի տվել մինչև օրս, միայն լսել են, որ շտաբի պետին ձերբակալել են, հրամանատարին էլ ազատել են աշխատանքից, դա արդեն երեկ իմացենք»,- Factor TV-ի հետ զրույցում ասում է զոհված զինծառայողի հարազատներից Նաիրա Զուլալյանը։
Պաշտպանության նախարարությունը, սակայն, չի պարզաբանում, թե ինչ հիմնավորմամբ է պաշտոնից ազատվել բարձրաստիճան զինվորականը՝ քրեական վարո՞ւյթի, նոր երևան եկած հանգամանքների՞, թե՞ ծառայողական քննության արդյունքներով։
«Այս թեման կա՛մ որևէ առնչություն չունի կոնկրետ այդ վթարի դեպքի հետ, կա՛մ Ճամբարակի զորամասի հրամանատարին պաշտոնից ազատել են այլ պատճառով: Շատ կարևոր է հասկանալ՝ արդյո՞ք ծառայողական քննության հետևանք է եղել կոնկրետ զորամասի հրամանատարի պաշտոնից ազատելը»,- հարցեր է բարձրացնում ԱԺ նախկին պատգամավոր Տիգրան Աբրահամյանը։
Դեպքը տեղի էր ունեցել օգոստոսի 19-ին՝ ժամը 21։00-ի սահմաններում․ մթության մեջ վազող զինվորներին հարվածել էր «ԳԱԶ-53» մակնիշի բեռնատարը։ Վթարից հետո սկսեցին տեղեկություններ շրջանառվել, որ զորամասի ճաշարանում վիճաբանություն է տեղի ունեցել զինվորների միջև, և սպան պատժելու նպատակով ստիպել է նրանց վազել հակագազով։ Եվ մինչ ՊՆ-ից հերքում էին հակագազով լինելու հանգամանքը, որդեկորույս ընտանիքը հակառակն էր պնդում։
«Ժամը 9-ին հանգստի ժամ է, իմ երեխան ի՞նչ գործ ունի փողոցում, այն էլ՝ հակագազով, որ ո՛չ տեսել է, ո՛չ լսել է: Ու այդ վթարը որտեղի՞ց տեղի ունեցավ: Հակագազով է եղել իմ երեխան, գյուղացիք են տեսել, ով որ առաջին օգնությունը ցույց է տվել»,- News.am-ի հետ զրույցում ասել էր մայրը՝ Արմենուհի Վարդանյանը։
Նախկին պատգամավոր Տիգրան Աբրահամյանն ուշադրություն է հրավիրում այն հանգամանքին, որ վթարը տեղի է ունեցել Ճամբարակում տեղակայված ուսումնական զորամասում, այնինչ պաշտոնից ազատվել է Ճամբարակի ուղղությամբ մարտական հերթապահություն իրականացնող զորամասի հրամանատարը։
«Ճամբարակի գնդի հատվածում կա երկու զինվորական մաս: Առաջինը՝ բուն Ճամբարակի զորամասն է, որը, այդ թվում, մարտական հերթապահություն է իրականացնում, և դրա տարածքում տեղակայված է նաև բանակային կորպուսի ուսումնական գումարտակը: Եվ այդ ուսումնական գումարտակն ամբողջությամբ գտնվում է ոչ թե Ճամբարակի զորամասի հրամանատարի, այլ բանակային կորպուսի ենթակայության ներքո: Հիմա, եթե դեպքը տեղի է ունեցել այդ ուսումնական գումարտակում, նշանակում է, որ ընդհանուր Ճամբարակի զորամասի հրամանատարը դրա հետ ուղիղ առնչություն կարող է չունենալ»,- նշում է նա։
Այս պահին գործով երկու կալանավորված կա․ «ԳԱԶ-53» մակնիշի բեռնատարի վարորդը՝ ճանապարհային երթևեկության անվտանգության կանոնները խախտելու մեղադրանքով, և Ճամբարակի զորամասի գումարտակի շտաբի պետ Հ․Ս․-ն։ Վերջինի նկատմամբ քրեական հետապնդում է հարուցվել իշխանազանցության կամ իշխանությունը չարաշահելու մեղադրանքով։ Ավելին, Փաշինյանի մակարդակով հայտարարվեց, որ բեռնատարն ընդհանրապես չպետք է լիներ երթևեկության մեջ։
Զոհված զինծառայողի ընտանիքին, սակայն, քննությունը չի բավարարում։ Ավելին, անցնող երեք շաբաթների ընթացքում, ֆեյսբուքյան պաշտոնական ցավակցությունից զատ՝ որևէ պաշտոնյա կամ զինվորական չի այցելել ընտանիքին։
«Տպավորություն է, որ դեպք էր, անցավ գնաց, բայց չէ, այդպես չի իրականում։
Պատկերացնու՞մ եք ծնողի վիճակը, երբ իր երեխային սպասում էր, երբ պետք է գա, դիմավորի ու, ասենք, դեռ մի ամիս չէր անցել, և այս ամենը տեղի է ունենում։ Այս լռությունը, քողարկված վիճակը, անուններ, որոնք թաքցնում են, չեն ուզում, որ հանկարծ վենդետա լինի, բայց վենդետայի մասին խոսք անգամ չի կարող լինել, որովհետև ընտանիքն անգամ խոսելու ունակ չէ այս պահին»,- նշում է որդեկորույս ընտանիքի հարազատը։
Եվ մինչ ընտանիքը փորձում է ողբերգության մեղավորներին գտնել, Պաշտպանության նախարար Սուրեն Պապիկյանը դեպքից օրեր անց ուշագրավ հայտարարություն է անում․ «Այն, որ մահերի համար պետք է մեղադրել ՊՆ-ին, նորություն է ՀՀ-ում»։
Իսկ ո՞վ է պատասխանատու բանակում մահերի, դժբախտ պատահարների և նմանօրինակ ողբերգական դեպքերը կանխելու համար․ պաշտպանական գերատեսչությունը հորդորում է սպասել քննության ավարտին, այնինչ որդեկորույս ընտանիքն ունի բազմաթիվ հարցեր։
Մանրամասները՝ տեսանյութում։
Ռոզա Վարդանյան
