Կաթողիկոսի ու 6 եպիսկոպոսների գործով դատախազ Խաչատուր Գալստյանն իր դիմումի համաձայն ազատվել է աշխատանքից

Կաթողիկոսի ու 6 եպիսկոպոսների գործով դատախազ Խաչատուր Գալստյանն իր դիմումի համաձայն ազատվել է աշխատանքից։ Այս մասին Factor.am-ին հայտնել են Գլխավոր դատախազությունից։

Նշենք, որ այս գործով քրեական հետապնդումն իրականացրել և մեղադրական եզրակացությամբ այն դատարան է ուղարկել հենց ազատման դիմում ներկայացրած դատախազը։

Գլխավոր դատախազությունից, սակայն, նշել են, որ Գալստյանի՝ աշխատանքից ազատվելը որևէ կապ չունի դատական գործի հետ։

Գարեգին Երկրորդն ու վեց բարձրաստիճան հոգևորականները մեղադրվում են դատական ակտը չկատարելու մեջ։ Կաթողիկոսը պաշտոնանկ էր արել Մասյացոտնի թեմի առաջնորդ Գևորգ եպիսկոպոս Սարոյանին, իսկ դատարանը պարտավորեցրել էր նրան վերականգնել պաշտոնում։ Մայր Աթոռը, սակայն, նրան չի վերականգնել և կարգալույծ է արել՝ հայտարարելով, որ այս հարցերը դատարանի տիրույթում չեն և դատարանի միջամտությունը որակել որպես միջամտություն եկեղեցու ինքնավարությանը։

Այս գործով արդեն երրորդ դատավոր Վահագն Մելիքյանը դիմել է Վճռաբեկ դատարան՝ գործի ընդդատության հարցը լուծելու համար։ Մինչ այդ Արմավիրի մարզի ընդհանուր իրավասության դատարանի դատավոր Սերժ Ռուշանյանը դատական նիստի ընթացքում բարձրացրել էր գործի տարածքային ընդդատության հարցը և դրա հիմքով որոշել գործն ուղարկել Երևանի քրեական դատարան։

Ռուշանյանը դատական նիստի ընթացքում նշել էր, որ Ամենայն հայոց կաթողիկոսի մեղադրանքում տվյալներ չկան այն մասին, թե, ըստ գործի, որտեղ է կայացվել կարգալույծ անելու որոշումը։ Նրա պնդմամբ՝ այդ հանգամանքը կարևոր է՝ որոշելու համար, թե որտեղ պետք է քննվի գործը։

Գործը Երևանի քրեական դատարան ուղարկելուց հետո այն մակագրվել է դատավոր Վահագն Մելիքյանին, որը, ինչպես պարզվում է, համաձայն չէ, որ գործը պետք է քննի Երևանի դատարանը։

Ի սկզբանե այս գործը մակագրվել էր Արմավիրի մարզի առաջին ատյանի դատարանի դատավոր Հակոբ Մանուկյանին։ Վերջինս ինքնաբացարկ էր հայտնել՝ նշելով, որ ժամանակին իրեն փաստաբանի արտոնագիր է հանձնել Արա Զոհրաբյանը, որը դատարանում պաշտպանում է Կաթողիկոսի և վեց եպիսկոպոսների շահերը։

Արփի Հակոբյան