Ուիթքոֆը սկսել է վախենալ․ Թրամփի բանագնացների՝ Կիև առաջին այցը կարող է խափանվել

Ամերիկացի բանակցողներ Սթիվ Ուիթքոֆի և Ջարեդ Քուշների՝ Կիև այցը, որի մասին հայտարարել էր Ուկրաինայի նախագահ Վլադիմիր Զելենսկին, կարող է  խափանվել։ Այս մասին հայտնում է  The Kyiv Independent-ը՝ վկայակոչելով իրազեկ աղբյուրի։ Նրա  խոսքով՝ Սթիվ Ուիթքոֆը «սկսել է վախենալ» Կիև մեկնելուց, գրում է Meduza-ն։

«Ռուսները չեն ցանկանում, որ նրանք գան այստեղ, իսկ Ուիթքոֆը միշտ զգայուն է վերաբերվել  նրանց տրամադրությունների նկատմամբ։ Նրան այնտեղ  ասում են, որ դա վտանգավոր է»,- ասել է աղբյուրը։

Ենթադրվում էր, որ բանակցողները սեպտեմբերի 5–6-ին կայցելեն Ուկրաինա և Ռուսաստան։ Ըստ ռուսական ՏԱՍՍ գործակալության՝ Ուիթքոֆն ու Քուշները նախ պետք է ժամանեն Մոսկվա, ապա՝ Կիև։

Այդ ժամկետներում այցի նախապատրաստման մասին հայտնում են նաև ուկրաինական աղբյուրները։

The Kyiv Independent-ի տվյալներով՝ բանակցողները նախատեսում են Կիև ժամանել ինքնաթիռով։ Պարբերականը հիշեցնում է, որ ավելի վաղ աղբյուրները հայտնել էին, թե Ուիթքոֆի համար «դժվար է» գնացքով ճանապարհորդելը՝ դա անվանելով պատճառներից մեկը, թե ինչու ամերիկացի բանակցողները չեն այցելում Ուկրաինա։ Կիևի օդային տարածքը լայնածավալ պատերազմի սկսվելուց ի վեր փակ է, ուստի օտարերկրյա պատվիրակությունները Ուկրաինայի մայրաքաղաք են ժամանում երկաթուղով։

Ռուսական զորքերը արդեն ավելի քան մեկ շաբաթ է՝ ամեն օր հարձակվում են Կիևի վրա, այդ թվում՝ օգտագործելով ռեակտիվ անօդաչու թռչող սարքեր, որոնք ավելի դժվար է խոցել։

Ուիթքոֆը և Քուշները բազմիցս մեկնել են Մոսկվա՝ բանակցությունների, սակայն ոչ մի անգամ չեն եղել Կիևում։

Ավելի վաղ հաղորդվել էր, որ Ուիթքոֆն ու Քուշները նախատեսում էին օգոստոսին այցելել Ուկրաինա և Ռուսաստան։ Մասնավորապես, ոչ պաշտոնական տեղեկությունների համաձայն՝ բանակցողները պետք է Կիև ժամանեին Ուկրաինայի Անկախության օրը՝ օգոստոսի 24-ին։

Կրեմլում այցի հստակ ժամկետները չէին  նշել, սակայն Ուիթքոֆին և Քուշներին անվանել՝ «ցանկալի հյուրեր»։

ՏԱՍՍ-ի աղբյուրները, մեկնաբանելով օգոստոսին բանակցողների՝ Մոսկվա չկայացած այցը, հայտնել էին, որ «հետաձգելու պատճառներ կան»։

Թարգմանությունը՝ Էմմա Չոբանյանի