Ամենայն հայոց կաթողիկոսի և 6 եպիսկոպոսների գործով դատավորը դիմել է Վճռաբեկ դատարան

Ամենայն հայոց կաթողիկոս Գարեգին Բ-ի և վեց եպիսկոպոսների գործով դատավոր Վահագն Մելիքյանը դիմել է Վճռաբեկ դատարան՝  գործի ընդդատության հարցի լուծման համար։ Այս մասին տեղեկությունը հաստատում են Դատական դեպարտամենտից:

Հիշեցնենք, որ Արմավիրի մարզի ընդհանուր իրավասության դատարանի դատավոր Սերժ Ռուշանյանը նախորդ շաբաթ տեղի ունեցած դատական նիստի ընթացքում բարձրացրել էր գործի տարածքային ընդդատության հարցը, ինչի հիմքով որոշում է կայացրել գործն ուղարկել Երևանի քրեական դատարան: Կաթողիկոսն ու 6 եպիսկապոսները մեղադրվում են դատական ակտ չկատարելու մեջ, որը դրսևորվել է դատարանի կողմից սահմանված արգելքի պայմաններում Արման Սարոյանին կարգալույծ անելով: Դատավոր Սերժ Ռուշանյանը դատական նիստի ընթացքում նշել էր, որ Ամենայն հայոց կաթողիկոսի մեղադրանքում առկա չէ տվյալ այն մասին, թե, ըստ գործի, որտեղ է կայացվել կարգալույծ անելու որոշումը: Իսկ այս հանգամանքը կարևոր է՝ որոշելու համար, թե որտեղ պետք է քննվի գործը:

Այսպիսով՝ դատավոր Ռուշանյանը որոշել էր գործն ուղարկել Երևանի քրեական դատարան, որտեղ այն մակագրվել է դատավոր Վահագն Մելիքյանին, որը, ինչպես պարզվում է, համաձայն չէ, որ գործը պետք է քննի Երևանի դատարանը:

Քրեական դատավարության օրենսգրքի 263-րդ հոդվածի համաձայն՝

Նախնական դատալսումների ընթացքում պարզելով, որ տվյալ վարույթն ընդդատյա չէ իրեն, դատարանն այն որոշմամբ անհապաղ փոխանցում է ըստ ընդդատության: Նույն հոդվածի 4-րդ մասով սահմանվում է, որ վարույթն ըստ տարածքային ընդդատության ստացած առաջին ատյանի ընդհանուր իրավասության դատարանը մինչև նախնական դատալսումներ նշանակելը եռօրյա ժամկետում որոշում է կայացնում վարույթը Վճռաբեկ դատարանի քրեական պալատ ուղարկելու մասին, եթե համաձայն չէ վարույթի տարածքային ընդդատությանը:

Նույն հոդվածի 7-րդ մասով էլ սահմանվում է, որ այս դեպքում Վճռաբեկ դատարանի քրեական պալատը վարույթը Վճռաբեկ դատարանում ստանալու պահից հնգօրյա ժամկետում վերջնականապես լուծում է վարույթի տարածքային ընդդատության հարցը։

Այսինքն՝ տվյա դեպքում Վճռաբեկ դատարանի քրեական պալատը ստանալուց հետո հնգօրյա ժամկետում պետք է որոշի, թե որ դատարանը պետք է քննի կաթողիկոսի և եպիսկոպոսների վերաբերյալ գործը:

Արաքս Մամուլյան