Եթե ոչ այս աշնանը, ապա հաջորդ գարնանը կսկսվի TRIPP-ի շինարարությունը․ Միրզոյան

TRIPP նախագծի փաստաթղթային փուլը մոտենում է ավարտին, իսկ ենթակառուցվածքի շինարարությունը, ըստ նախնական գնահատականների, կարող է սկսվել արդեն հաջորդ տարվա գարնանը։ Այս մասին Հանրային հեռուստաընկերությանը տված հարցազրույցում հայտարարել է ՀՀ արտաքին գործերի և միջազգային առևտրի նախարար Արարատ Միրզոյանը։

«Ես և Միացյալ Նահանգների պետքարտուղարը ստորագրեցինք TRIPP-ի պայմանագիրը։ Պայմանագիրը կստանա Սահմանադրական դատարանի եզրակացությունը, որից հետո կգնա Ազգային ժողով վավերացման»,- ասաց ԱԳՄԱ նախարարը։

Նախարարի խոսքով՝ դրան զուգահեռ բանակցությունների ավարտին են մոտենում ևս առնվազն երկու կարևոր փաստաթուղթ, որոնք վերաբերում են TRIPP Development Company-ի ստեղծմանը և դրա գործունեության կազմակերպմանը։

«TRIPP Development Company պետք է հիմնադրվի, այդ ընկերության կանոնադրությունն է, բաժնետերերի համաձայնությունը և այլն։ Սրանք ավարտելուց հետո կարող ենք ասել, որ փաստաթղթային փուլը ավարտեցինք»,- նշեց Միրզոյանը։

Նրա խոսքով՝ փաստաթղթային աշխատանքներին զուգահեռ արդեն իրականացվում են նաև տեղում անհրաժեշտ մասնագիտական ուսումնասիրություններ։

«Մի փուլ արդեն տեղի է ունեցել՝ նախնականը, մյուսը ընթանում է»,- ընդգծեց նախարարը։

Նա վստահեցրեց, որ աշխատանքներն ընթանում են արագացված տեմպերով և, իր գնահատմամբ, նույնիսկ առաջ են նախապես ենթադրված ժամանակացույցից։

Նախարարի խոսքով՝ նախագծի արագ իրականացմամբ շահագրգռված են ոչ միայն Հայաստանը, Միացյալ Նահանգները և Ադրբեջանը, այլև տարածաշրջանի և ավելի լայն աշխարհագրության բազմաթիվ երկրներ։

«Սա բխում է և՛ մեր շահերից, և՛ Միացյալ Նահանգների շահերից, և՛ Ադրբեջանի շահերից, բոլոր հարևան, բոլոր շահագրգիռ կողմերից՝ Լիսաբոնից Պեկին։ Բոլորը ուզում են դա տեսնել օր առաջ գործող»,- ասաց նա։

Ե՞րբ հնարավոր կլինի տեսնել շինարարական աշխատանքները։

«Ես կարծում եմ, որ եթե ոչ այս ուշ աշնանը, ապա պետք է որ հաջորդ գարնանը մենք շինարարությունը տեսնենք, այսինքն՝ սկսված լինի»,- ասաց ԱԳՄԱ նախարարը։

Միրզոյանն ընդգծեց նաև, որ TRIPP-ը միայն երկաթուղային նախագիծ չէ և ենթադրում է ենթակառուցվածքների ավելի լայն համալիրի ստեղծում։

Նրա խոսքով՝ առաջին փուլում կարող է առաջնահերթություն ստանալ էլեկտրահաղորդման գծերի և էլեկտրաէներգիայի տարանցման ուղղությունը, որը, ըստ նրա, հնարավոր է ավելի արագ իրականացվի, քան երկաթուղային ենթակառուցվածքի կառուցումը։

Արփի Հակոբյան