Քաղաքականություն
04.12.2018 | 11:47Բոլոր հավաստիացումները, որ Հայաստանը կպահպանի ՀԱՊԿ գլխավոր քարտուղարի պաշտոնը, իշխանության ստերից էին, որովհետև սեպտեմբեր ամսից հայտնի էր նրանց, որ դա հնարավոր չէ։
Այս մասին այսօր հրավիրված մամուլի ասուլիսի ժամանակ աասաց «Հանրապետական» կուսակցության պատգամավորի թեկնածու Դավիթ Շահնազարյանը։
Պատգամավորի թեկնածուն խոսեց նաև արցախյան հարցի բանակցային գործընթացի մասին և նշեց, որ այդ բանակցությունների բովանդակության մասին բարձրաձայնել է վարչապետը՝ ՄԱԿ-ի գլխավոր Ասամբլեայում։
«Մեզ համար չափազանց կարևոր է Լեռնային Ղարաբաղի կարգավիճակն ու անվտանգությունը։ Ներկայիս Կառավարության դիրքորոշման մեջ այս երկու կարգավիճակները իրարից տարանջատվել են, ինչը շատ լուրջ նահանջ է երկրի նախկին ղեկավարի՝ Սերժ Սարգսյանի դիրքորոշումից, իսկ նախկին դիրքորոշումը հետևյալն էր․ կարգավիճակ՝ տարածքների դիմաց՝ այսինքն՝ խաղաղության պայմանագիր Ադրբեջանի հետ, որտեղ բոլոր հարցերը պետք է ամրագրված լինեին»,-ասաց Շահնազարյանը։
Դավիթ Շահնազարյանը խոսեց նաև Հայաստան-Եվրամիություն հարաբերությունների մասին և շեշտեց. «Նախկին իշխանությունների օրոք ստորագրվեց ԵՄ-ի հետ համապարփակ և ընդլայնաված համագործակցության պայմանագիրը (ՀՀ – ԵՄ Համապարփակ և ընդլայնված գործընկերության համաձայնագիրը- խմբ.), որտեղ ամրագրված էին միջազգային իրավունքի և Հելսինկյան եզրափակիչ ակտի սկզբունքներից երեքը՝ տարածքային ամբողջականություն, ժողովուրդների իրավահավասարության իրավունք, ուժի չկիրառման իրավունք»։
«ԵՄ դիրքորոշումն ավելի վաղ հետևյալն էր, որ եթե Ադրբեջանի հետ էլ նման փաստաթուղթ ստորագրվի, այս երեք կետերն անպայման պետք է մեջը ներառվեն։ Բայց Ադրբեջանն այս տարի ԵՄ-ի հետո բանակցություններ էր վարում, դրանք գրեթե ավարտվել են և այն նույն ԵՄ բարձրաստիճան պաշտոնյաները, որոնք պնդում էին, որ այդ երեք կետերը պետք է լինեն՝ այլ ձևակերպումներ են անում: Սա, իհարկե, շատ մեծ կորուստ է, քանի դեռ փաստաթուղթ չի ստորագրվել, ժամանակ կա, փորձեք մի բան անել, հետո չբողոքեք, թե ԵՄ-ն երկակի ստանդարտներ էր կիրառում»,- ասաց Դավիթ Շահնազարյանը։
