26.10.2026 | 12:54
ԱՄՆ-ն 3,5 մլն դոլար է ներդրել Հայաստանի սահմանային անվտանգության համակարգում․ ծրագիրը կնպաստի նաև ԹՐԻՓՓ-ի իրականացմանը
Մ-17 ԱԱ. Դավիթ Բալեյանը պարտվեց մեդալային գոտեմարտում
01.08.2026 | 18:26
Դավիթ Բալեյանը (55 կգ) չկարողացավ մեդալ նվաճել Բաքվում ընթացող ազատ ոճի ըմբշամարտի աշխարհի մինչև 17 տարեկանների առաջնությունում:
Հայաստանի ներկայացուցիչը բրոնզե մեդալը վիճարկեց իրանցի Էսմաիլ Էլահիչորանի հետ ու պարտվեց 2:5 հաշվով:
Դավիթ Բալեյանը պայքարը սկսել էր որակավորման փուլից, որտեղ 8:6 հաշվով հաղթել էր լեհ Մացեյ Մրոժեկին, իսկ 1/8 եզրափակիչում նրա մեքսիկացի մրցակիցը հրաժարվել էր գոտեմարտից: Քառորդ եզրափակիչում հայ ըմբիշը 4:1 հաշվով ուժեղ էր գտնվել վրացի Սաբա Մինդիաշվիլիից, իսկ կիսաեզրափակիչում 1:7 հաշվով պարտվել էր ուզբեկ Ջախոնգիր Տուլկունովին:
Օգոստոսի 1-ին պայքարի մեջ են մտել Հայաստանի վերջին երեք ներկայացուցիչները՝ Մուրադ Ղարիբյանը (51 կգ), Գրիշա Գևորգյանը (60 կգ) և Վարուժան Ասլանյանը (71 կգ), որոնք պարտություն են կրել մեկնարկային գոտեմարտերում։
Վարուժան Ասլանյանին հաղթած վրացի ըմբիշը դուրս է եկել եզրափակիչ` Հայաստանի ներկայացուցիչին տալով բրոնզե մեդալի համար պայքարելու հնարավորություն։ Օգոստոսի 2-ին հայ ըմբիշը սփոփիչ գոտեմարտ կանցկացնի բելառուս Վիտալի Հարձեի հետ։
Էրիկ Պապիկյանը (65 կգ) հնարավորություն էր ստացել պայքարել բրոնզե մեդալի համար, սակայն պարտություն է կրել սփոփոիչ գոտեմարտում ու ավարտել ելույթները։
Ազատ ոճի ըմբշամարտի Հայաստանի Մ-17 հավաքականն ԱԱ-ին մասնակցում է 6 ըմբիշով:
Հիշեցնենք, որ հունահռոմեական ոճի ըմբշամարտի Հայաստանի Մ-17 հավաքականն աշխարհի առաջնությանը մասնակցել էր 10 ըմբիշով ու նվաճել 1 ոսկե և 2 բրոնզե մեդալ: Ջանես Նազարյանը (71 կգ) նվաճել էր աշխարհի Մ-17 չեմպիոնի կոչումը, իսկ Արարատ Ավետիսյանը (48 կգ) և Գևորգ Հարությունյանը (51 կգ) դարձել էին բրոնզե մեդալակիր:
