ՖԻՖԱ-ն հրաժարվել է Աշխարհի առաջնության իրավունքների վաճառքի ծրագրից

Ֆուտբոլի միջազգային ֆեդերացիան (ՖԻՖԱ) հրաժարվել է Աշխարհի առաջնության իրավունքները մասնավոր ներդրողներին վաճառելու ծրագրից։ Այդ մասին կազմակերպության պաշտոնական կայքում հրապարակված հայտարարության մեջ հայտնել է ՖԻՖԱ-ի նախագահ Ջաննի Ինֆանտինոն։

«Ուշադիր լսելով բոլոր կարծիքները՝ մենք եկել ենք այն եզրակացության, որ նախագիծն առաջացրել է այնպիսի տարաձայնություններ, որոնք, անկախ աջակցության մակարդակից, այլևս չեն համապատասխանում սկզբնական նպատակին»,- նշել է Ինֆանտինոն։

Նրա խոսքով՝ ՖԻՖԱ-ի նպատակը «միշտ եղել և մնում է միավորել ու զարգացնել» համաշխարհային ֆուտբոլը։

Մի քանի օր առաջ հայտնի էր դարձել, որ ՖԻՖԱ-ն քննարկում է Աշխարհի առաջնության առևտրային իրավունքների մոտ 20 տոկոսը մասնավոր ներդրողների խմբին վաճառելու հնարավորությունը։ Նախատեսվում էր, որ բաժնեմասը կստանա ներդրողների խումբը, որը գլխավորում է Ջոշուա Քուշները՝ ԱՄՆ նախագահ Դոնալդ Թրամփի փեսա Ջարեդ Քուշների եղբայրը։

Նախաձեռնությունը բուռն քննադատության էր արժանացել բազմաթիվ ազգային ֆուտբոլային ֆեդերացիաների կողմից։ ՈՒԵՖԱ-ի բոլոր 55 անդամները, այդ թվում՝ Ռուսաստանը, որը հեռացված է միջազգային մրցաշարերից, հայտարարել էին, որ կբոյկոտեն Աշխարհի առաջնությունները, եթե կոմերցիոն իրավունքների վաճառքի որոշումն ընդունվի։

Օրեր առաջ ՈՒԵՖԱ-ն հայտարարություն էր տարածել՝ նշելով, որ ՈՒԵՖԱ-ն և իր անդամ ասոցիացիաները չեն մասնակցի ՖԻՖԱ-ի մրցաշարերին, մինչև ՖԻՖԱ-ն չվերանայի իր որոշումը։