Վարդավառի ջրոցին «ագրեսիա» էր որակել. ռուս բլոգերի նկատմամբ վարույթ է նախաձեռնվել

ՀՀ քննչական կոմիտեում վարույթ է նախաձեռնվել ինստագրամյան ռուս բլոգեր Նադեժդա Պիրոժկովայի նկատմամբ, որը սոցիալական ցանցերում կոշտ քննադատության էր ենթարկել Վարդավառի տոնը և հայկական ավանդույթը։

Համացանցում տարածված տեսանյութում «pirzhokova_pro.online» էջի օգտատերը դժգոհություն է հայտնել Վարդավառի օրը ջրոցիի ավանդույթից։ Նա նշել է, թե այդ օրը ամենից շատ ցանկանում է հեռանալ քաղաքից՝ տեղի ունեցողը որակելով որպես «հայերի շինծու մշակույթի և առավելագույն անտակտության բախում»։ Ըստ օգտատիրոջ՝ հայերը չեն հասկանում անձնական սահմանները, իսկ միմյանց և անցորդներին ջրելը ոչ թե մշակույթ է, այլ «անհարգալից վերաբերմունք» և «ագրեսիայի ուղղակի դրսևորում»։

«Եթե ես գտնվում եմ ձեր երկրում, պարտավոր չեմ հետևել ինչ-որ ավանդույթների», – հայտարարում է նա տեսանյութում։

Այսպիսով, ՔԿ-ից Factor.am-ին հայտնել են, որ հայտարարությունների հիման վրա նախաձեռնվել է քրեական վարույթ։ Ոստիկանության ծառայողները հայտնաբերել են էջի օգտատիրոջը և ներկայացրել վարույթն իրականացնող մարմնին։

Վերջինիս նկատմամբ հարուցվել է հանրային քրեական հետապնդում ՀՀ քրեական օրենսգրքի 329-րդ հոդվածի 2-րդ մասի 3-րդ կետով (ատելություն, խտրականություն, անհանդուրժողականություն կամ թշնամանք հրահրելուն կամ քարոզելուն ուղղված հրապարակային խոսքը, ինչպես նաև այդ նպատակով նյութեր կամ առարկաներ տարածելը)։ Որպես խափանման միջոց է ընտրվել բացակայելու արգելքը։

Այս պահին նախաքննությունը շարունակվում է։

Եվգենյա Համբարձումյան