Հաշիվների արգելափակում․ Պետդուման սահմանափակող օրենք է ընդունել արտասահման մեկնած և հեռակա դատապարտված ռուսների համար

ՌԴ Պետդուման երկրորդ և երրորդ ընթերցմամբ ընդունել է «ժամանակավոր սահմանափակող միջոցառումների մասին» օրենքը։ Սա վերաբերում է այն քաղաքացիներին, որոնք գտնվում են Ռուսաստանից դուրս և «խուսափում» են պատժից։ Ընդունված օրենքում նշված սահմանափակումներն ու արգելքները վերաբերում են Ռուսաստանից դուրս գտնվող յուրաքանչյուր անձի, որը դատապարտվել է Քրեական օրենսգրքի որևէ հոդվածով, գրում է Meduza-ն։

Ավելին, սահմանափակումները կանդրադառնան նաև վարչական գործերով մեղադրյալներին։ Դրանց թվում են նրանք, ովքեր չեն վճարել տուգանքները «օտարերկրյա գործակալության», «անցանկալի կազմակերպության» գործունեությանը մասնակցելու, Ռուսաստանի Դաշնության տարածքային ամբողջականությունը խախտելու և պատժամիջոցներ կիրառելու կոչերի, ինչպես նաև ռուսական բանակը «վարկաբեկելու» մասին հոդվածներով։

Ռուսաստանի Դաշնությունում նման անձանց նկատմամբ կկիրառվի «ժամանակավոր սահմանափակող միջոցառումների համալիր»։ Դրանք ներառում են՝ հաշիվների արգելափակում, նախկինում տրված բոլոր լիցենզիաների, թույլտվությունների և հավատարմագրերի կասեցում, անշարժ գույքի և տրանսպորտային միջոցների վաճառքի արգելք, երկրի ներսում պետական ​​ծառայությունների և արտասահմանում հյուպատոսական ծառայությունների մատուցման մերժում (օրինակ՝ արտասահմանյան անձնագիր ստանալու արգելք և գործարքների, կտակների և լիազորագրերի նոտարական վավերացման արգելք)։

Երկրորդ ընթերցման ուղարկվելիս օրինագծին ավելացվել են լրացուցիչ սահմանափակումներ։ Բանկերը պարտավոր կլինեն արգելափակել հավելվածների մուտքը, որ մարդիկ, որոնց վրա տարածվում է օրենքը, դրամական միջոցներ չկարողանան  փոխանցել։ Ավելին, նրանց եկամուտը կփոխանցվի հատուկ հաշվի, որից կգանձվեն դատական ​​ծախսերը։

Երկրորդ և երրորդ ընթերցումների քվեարկությունից առաջ Պետդումայի խոսնակ Վյաչեսլավ Վոլոդինը հայտարարել է, որ «նրանք, ովքեր հեռացել են, պետք է մտածեն այն մասին, թե ինչպես կարող են ներկայանալ դատարան և խոստովանել»։

«Խոսքը նրանց մասին է, ովքեր վնասում են մեր երկրին։ Ծայրահեղականների, մեր հայրենիքի դավաճանների մասին։ Նրանց մասին, ովքեր տարիներ շարունակ փորձել են ոչնչացնել մեր պետությունը։ Նրանք արդարացնում են նացիզմը և վիրավորում մեր զինվորներին ու սպաներին։ Մինչդեռ նրանք թաքնվում են այլ երկրներում պատժից, մի շարք երկրներ հովանավորում են նրանց»,- ասել է Վոլոդինը։

Նշվում է, որ օրենքն ուժի մեջ կմտնի պաշտոնական հրապարակումից հետո։

Թարգմանությունը՝ Էմմա Չոբանյանի