Ռոսավիացիան նվազեցրել է Մոսկվայի մոտակայքում թռիչքների բարձրության շեմը և արգելել քաղաքով տարանցիկ չվերթները

Ռոսավիացիան Մոսկվայի օդանավակայանների մերձակայքում ինքնաթիռների թռիչքի առավելագույն բարձրությունը նվազեցրել է մինչև 4900 մետրի և արգելել տարանցիկ թռիչքները, հաղորդում է «Կոմերսանտ»-ը՝ հղում անելով օդային տարածքի օգտատերերին ուղղված ծանուցմանը (NOTAM), գրում է Meduza-ն։

Սահմանափակումները վերաբերում են քաղաքացիական, փորձարարական և պետական ​​ավիացիային, ինչպես նաև ռուսական և արտասահմանյան ավիաընկերությունների թռիչքներին։ Դրանք ուժի մեջ են մինչև օգոստոսի 26-ը Մոսկվայի հանգույցային դիսպետչերական գոտիներում (Շերեմետևո, Վնուկովո և Դոմոդեդովո օդանավակայաններ):

Լրատվամիջոցի աղբյուրները կարծում են, որ NOTAM-ը կերկարաձգվի։ Իր հերթին, Ռոսավիացիան հայտնել է, որ սահմանափակումները սահմանվել են հուլիսի 11-ից մինչև օգոստոսի 12-ը՝ «թռիչքների անվտանգությունն ապահովելու համար»։

«Կոմերսանտ»-ի աղբյուրների համաձայն՝ սահմանափակումները նախաձեռնել է Ռուսաստանի պաշտպանության նախարարությունը՝ գարնանից ի վեր ուկրաինական անօդաչու թռչող սարքերի հարձակումների հաճախականության աճի պատճառով։

Լրատվամիջոցի կողմից հարցված աղբյուրներն ու փորձագետները նշել են այս որոշման մի քանի հնարավոր հետևանքներ։  Նախ՝ տարանցիկ չվերթների արգելքը զգալիորեն կնվազեցնի Մոսկվայի օդանավակայանի գոտում չվերթների հաճախականությունը։ Բարձրության նվազմանը զուգընթաց՝ վառելիքի սպառումը և թռիչքի տևողությունը կավելանան 5-15 րոպեով մեկ թռիչքի համար, իսկ տարանցիկ թռիչքների տևողությունը կավելանա առնվազն 20-30 րոպեով։ Թռիչքի թույլատրելի բարձրության նվազեցումը մեծացնում է թռչունների հետ բախման վտանգը։

Նոր սահմանափակումների ազդեցությունը մասշտաբով անհամաչափ է այն վնասների հետ, որ ավիաընկերությունները կրում են «Գորգ» ռեժիմի ընթացքում օդային տարածքի փակման պատճառով, որը սահմանվում է անօդաչու թռչող սարքերի հարձակումների վտանգի ժամանակ, հայտնել են ավիափոխադրողների շրջանակի աղբյուրները։ Մասնագետները կարծում են, որ Մոսկվայում սահմանափակումները, հավանաբար, չեն վերացվի մինչև պատերազմի ավարտը և կարող են տարածվել այլ տարածաշրջանների վրա։

Հունիսին ռազմական գերատեսչության պահանջով Ռոսավիացիան Ռուսաստանի մի քանի շրջաններում արգելել էր թեթև և գերթեթև ինքնաթիռների, ինչպես նաև քաղաքացիական անօդաչու թռչող սարքերի թռիչքները մինչև 5200 մետր բարձրության վրա: Արգելքն ուժի մեջ է՝ «մինչև հետագա ծանուցում»:

Թարգմանությունը՝ Էմմա Չոբանյանի