Ավագանու անդամը քվեարկել է եղբոր ընտանիքին բնակարան նվիրելու օգտին․ ինչու ԿԿՀ-ն չի քննել Հայկ Սիսակյանի դեպքը

«Ուղղակի ժողովրդավարություն» հասարակական կազմակերպությունը դիմել է Կոռուպցիայի կանխարգելման հանձնաժողով ու հայտնել, որ 2023 թվականի նոյեմբերի 16-ին Սպիտակ համայնքի ավագանին որոշել է համայնքային սեփականություն հանդիսացող մի շարք բնակարաններ նվիրատվությամբ փոխանցել որոշ անձանց։ Այդ որոշման հավելվածում եղել է նաև ավագանու անդամ Հայկ Սիսակյանի եղբոր՝ Գրիգոր Սիսակյանի անունը։ Սիսակյանը մասնակցել է ավագանու նիստին, ինքնաբացարկ չի հայտնել, բնակարանների փոխանցման որոշմանը քվեարկել է «կողմ»։

Նշվում է, որ հետագայում՝ 2026 թվականի հունիսի 25-ին, ավագանու այդ որոշման հիման վրա համայնքի ղեկավարը Սպիտակ քաղաքի Ա․Թորոսյան փողոցի 4/2 շենքի բնակարաններից մեկը նվիրատվությամբ փոխանցել է Գրիգոր Սիսակյանի ընտանիքին՝ ընդհանուր համատեղ սեփականության իրավունքով։ Կազմակերպության պնդմամբ՝ Հայկ Սիսակյանը մասնակցել է այնպիսի որոշման ընդունմանը, որից նյութական առավելություն է ստացել իր հարազատ եղբոր ընտանիքը։

«Ուղղակի ժողովրդավարությունը» պարզել է, որ Հայկ Սիսակյանն աշխատել է Սպիտակ համայնքի հիմնադրած բնակարանային և ենթակառուցվածքային սպասարկում իրականացնող համայնքային կազմակերպություններում։

Մասնավորապես, ՊԵԿ տվյալներով՝ նա տարբեր ժամանակահատվածներում աշխատել է «Սպիտակ համայնքի բնակարանների և ենթակառուցվածքների սպասարկման գրասենյակ» ՀՈԱԿ-ում, «Սպիտակի բնակարանների և կոմունալ սպասարկում» կազմակերպությունում, «Սպիտակ համայնքի ավտոպարկ և ենթակառուցվածքների սպասարկում» ՀՈԱԿ-ում։

Դիմող կազմակերպությունը ենթադրություն է հայտնել, որ իր աշխատանքի բնույթով պայմանավորված՝ Հայկ Սիսակյանը կարող էր ներգրավված լինել նաև բնակարանների հատկացման որոշման նախապատրաստման գործընթացում։ Սակայն որոշման տեքստից չի երևում, որ այս հանգամանքը փաստացի հաստատվել է։ Սա ներկայացվել է որպես դիմողի ենթադրություն։

Կազմակերպությունը Կոռուպցիայի կանխարգելման հանձնաժողովից խնդրել է Հայկ Սիսակյանի նկատմամբ վարույթ հարուցել և քննել շահերի բախման հնարավոր խախտումը, եզրակացություն ուղարկել Տարածքային կառավարման և ենթակառուցվածքների նախարարություն, որպեսզի նախարարությունն իր իրավասության շրջանակում իրավական հսկողություն իրականացնի։

Կոռուպցիայի կանխարգելման հանձնաժողովը, սակայն, մերժել է վարույթի հարուցումը՝ հղում կատարելով «Հանրային ծառայության մասին» և «Կոռուպցիայի կանխարգելման հանձնաժողովի մասին» օրենքներին։

Օրենքով հանձնաժողովը կարող է քննել շահերի բախման դեպքերը, երբ դրանք վերաբերում են՝

-պետական պաշտոն զբաղեցնող անձանց,
-համայնքների ղեկավարներին,
-համայնքների ղեկավարների տեղակալներին,
-Երևանի վարչական շրջանների ղեկավարներին և նրանց տեղակալներին,
-հանրային ծառայողներին։

Այս ցանկում համայնքի ավագանու անդամները ներառված չեն։ Նույն սահմանափակումը կա նաև «Հանրային ծառայության մասին» օրենքի 33-րդ հոդվածում։ Շահերի բախման մասին այդ հոդվածի դրույթները տարածվում են պետական պաշտոն զբաղեցնող որոշ անձանց, համայնքների ղեկավարների ու նրանց տեղակալների և հանրային ծառայողների վրա, բայց ավագանու անդամների վրա չեն տարածվում։

Հանձնաժողովը նշել է՝ նույնիսկ եթե ներկայացված փաստերում հնարավոր շահերի բախման հատկանիշներ կան, ԿԿՀ-ն օրենքով լիազորված չէ ավագանու անդամի նկատմամբ նման վարույթ հարուցել։ Հանձնաժողովը չի հայտարարել, որ Սիսակյանի գործողություններում շահերի բախում չի եղել։

Հայկ Սիսակյանը Սպիտակի ավագանու «Քաղաքացիական պայմանագիր» խմբակցության անդամ է։

Եվգենյա Համբարձումյան