Հենրիխ Մխիթարյան․ «Նոր մրցաշրջանում կտեսնեք ավելի լավ Մխիթարյան»

Հայաստանի ազգային հավաքականի նախկին ավագ Հենրիխ Մխիթարյանը պատմել է, թե ինչու է որոշել մեկ տարով երկարաձգել Իտալիայի չեմպիոն «Ինտերի» հետ գործող պայմանագիրը։

«Ակումբի հետ խոսել էի «Բոլոնիայի» հետ խաղից հետո։ Գնահատեցի իրավիճակը և զգացի, որ կարող եմ խաղալ ևս մեկ տարի։ Իհարկե, դա չի նշանակում, որ ես կդադարեմ խաղալ առաջիկա մրցաշրջանից հետո։ Բայց հիմա իմ ուշադրությունը միայն այս մրցաշրջանի և վրա է. ապագայի մասին կմտածեմ ավելի ուշ։

Նոր մրցաշրջանում կարող եք ակնկալել ավելի լավ Միկի, քան նախորդում էր։ Չնայած տարիքը զգալ է գալիս, բայց ես այստեղ եմ՝ պատրաստ օգնելու թիմակիցներիս և կատարելագործվելու՝ թիմի նպատակներին հասնելու համար»,- 37-ամյա կիսապաշտպանի խոսքը մեջբերում է La Gazzetta dello Sport-ը։

Այս օրերին «Ինտերը» հավաք է անցկացնում Գերմանիայում՝ պատրաստվելով նոր մրցաշրջանին։ Հենրիխ Մխիթարյանի խոսքով, միլանյան ակումբը մեծ հավակնություններ ունի նաև գալիք մրցաշրջանում։

«Մեր հավակնությունները մեծ են։ Ցանկանում ենք հաղթել Իտալիայի առաջնությունում, գավաթի խաղարկությունում, սուպերգավաթում, իսկ Չեմպիոնների լիգայում որքան հնարավոր հեռու գնալ։ Դրանք բարդ նպատակներ են, բայց իրագործելի։ Կրիստիան Կիվուն արդեն ցույց է տվել, թե ինչի է ընդունակ որպես մարզիչ։ Եվ մենք աջակցում ենք նրան, քանի որ մենք ընտանիք ենք և ունենք մեր նպատակները, որոնք միասին ենք հետապնդում»,- ասել է Մխիթարյանը։

Հիշեցնենք, որ Հայաստանի հավաքականի պատմության լավագույն ռմբարկուն 2022 թվականից է խաղում «Ինտերում», որի կազմում 2-ական անգամ դարձել է Իտալիայի չեմպիոն, գավաթակիր, սուպերգավաթակիր ու երկու անգամ խաղացել է Չեմպիոնների լիգայի եզրափակիչում։ Ավարտված մրցաշրջանում հայ կիսապաշտպանը մասնակցել է 39 հանդիպման, դարձել 4 գոլի ու 3 գոլային փոխանցման հեղինակ։