Մոսկվան և Բաքուն շարժվում են դեպի դաշնակցային համագործակցության ներուժի լիարժեք բացահայտում. Լավրով

Ռուսաստանն ու Ադրբեջանը շարժվում են 2022 թվականի փետրվարին ստորագրված դաշնակցային համագործակցության համաձայնագրի ներուժի լիարժեք իրացման ուղղությամբ։ Ադրբեջանական լրատվամիջոցների փոխանցմամբ՝ այս մասին Մոսկվայում Ադրբեջանի արտգործնախարար Ջեյհուն Բայրամովի հետ ընդլայնված հանդիպման ժամանակ հայտարարել է Ռուսաստանի արտաքին գործերի նախարար Սերգեյ Լավրովը։

«Մենք ուրախ ենք, որ հնարավորություն ունենք շարունակելու մեր երկխոսությունն արտաքին գործերի նախարարությունների ղեկավարների մակարդակով։ Սա ամրապնդում է երկու երկրների նախագահների և կառավարությունների, նախարարությունների, գերատեսչությունների և խորհրդարանների միջև կանոնավոր շփումները։ Այս ամենը ցույց է տալիս, որ չնայած երբեմն առաջացող դժվարություններին (դրանք անխուսափելի են կյանքում)՝ մենք շարժվում ենք դեպի 2022 թվականի փետրվարի 22-ին մեր կողմից ստորագրված Դաշնային համագործակցության մասին Մոսկվայի հռչակագրի ներուժի լիարժեք իրացումը»,- ասել է Լավրովը։

Նրա խոսքով՝ այս տարի կողմերը լուծել են ընդհանուր ողբերգության (AZAL-ի ինքնաթիռի կործանման) հետ կապված բոլոր հարցերը։

«Այս տարի, ամենաբարձր մակարդակով ձեռք բերված համաձայնությունների և կառավարությունների ու մեր նախարարությունների աշխատանքի շնորհիվ, մենք լուծել ենք 2024 թվականի դեկտեմբերի 25-ին AZAL-ի ուղևորատար ինքնաթիռի կործանման հետևանքների հետ կապված բոլոր հարցերը։ Այսօր մենք կքննարկենք մեր համագործակցության ներկա վիճակը և հեռանկարները տնտեսական ոլորտում։ Միջկառավարական հանձնաժողովի 24-րդ նիստը տեղի ունեցավ վերջերս՝ ապրիլին։ Մենք անպայման կքննարկենք Հարավային Կովկասում ստեղծված իրավիճակը։ Ուշադրություն ենք դարձրել «3+3» տարածաշրջանային համագործակցության հարթակի նկատմամբ աճող հետաքրքրությունը։ Այսպիսով, ես անհամբեր սպասում եմ այսօրվա արդյունավետ բանակցություններին»,- ասել է նա։

Լավրովը նշել է, որ պատրաստ են քննարկել փոխադարձ հետաքրքրություն ներկայացնող տարածաշրջանային և միջազգային հարցերի ամբողջ շրջանակը, այդ թվում՝ իրենց շփումներն ու համագործակցությունը միջազգային հարթակներում։

Թարգմանությունը՝ Էմմա Չոբանյանի