Հաստիքի կրճատո՞ւմ, թե՞ քաղաքական ենթատեքստ. ինչու է աշխատանքից ազատվել Փաշինյանի հետ վիճած բժշկուհին

Ինչո՞ւ է աշխատանքից ազատվել Նիկոլ Փաշինյանի հետ թեժ բանավեճ ունեցած թիվ 16 պոլիկլինիկայի մանկաբարձ-գինեկոլոգ, բժշկական գիտությունների թեկնածու Արփինե Սողոյանը․ Factor TV-ի հարցին ի պատասխան՝ պարզաբանում է ներկայացրել Երևանի քաղաքապետարանը։

«Առողջության պարտադիր ապահովագրության ընդունումից հետո Երևանի քաղաքապետարանի ենթակայության առողջապահական հաստատություններում տեղի են ունեցել հաստիքների կրճատումներ, այդ թվում՝ գինեկոլոգների։ Հավելյալ պահպանված հաստիքներն առաջացնում են լրացուցիչ ֆինանսական բեռ, այդ թվում՝ (բաժնի վարիչ) հասկացությունը, որը ֆինանսական փոխհատուցման ենթակա չէ։ Բուժական գծով փոխտնօրեններն ունակ են լուծելու բուժառուի ցանկացած հարց։ Այս գործընթացը սկսվել է դեռևս այս տարվա հունվարից՝ Առողջության պարտադիր ապահովագրության գործարկումից հետո»,- նշել է կառույցի լրատվական բաժնի պետ Օֆելյա Սիմոնյանը։

Հարցին՝ չկա՞, արդյոք, քաղաքական ենթատեքստ, հաշվի առնելով այն հանգամանքը, որ բժշկի ազատման մասին տեղեկությունները շրջանառվում էին դեռևս միջադեպի օրը, Սիմոնյանը նշեց՝ պարզաբանման մեջ ասված է, թե ինչու է հաստիքը կրճատվել։

Ավելի վաղ բժշկուհու դուստրը՝ փաստաբան Տաթևիկ Սողոյանը, ֆեյսբուքյան գրառմամբ տեղեկացրել էր, որ մայրն աշխատանքից ազատվել է։

«Երևանի պոլիկլինիկայում 21 տարվա անբասիր աշխատանքից հետո որոշվեց մայրիկիս աշխատանքից ազատել հաստիքի կրճատման հիմքով։ Այսինքն՝ այսուհետ պոլիկլինիկան կունենա կանանց կոնսուլտացիայի բաժին, բայց չի ունենա բաժնի ղեկավար։ Մի ամբողջ վարչական շրջանի հազարավոր կանայք, ներառյալ՝ ապագա մայրիկները, կմնան առանց բաժնի բազմափորձ ղեկավարի վերահսկողության։ Հաստիքի կրճատման հիմքով աշխատանքից ազատումը մայրիկիս բարեխիղճ աշխատանքի լավագույն ցուցիչն է, և մեր  ազատ խոսքը պաշտպանող «ժողովրդավարության բաստիոնի» հերթական վառ ապացույցը»,- գրել էր Սողոյանը։

Նրա փոխանցմամբ՝ որպես պաշտոնական պարզաբանում՝ իրենց փոխանցել են, որ պատճառը ֆինանսական վիճակն է. «Թե բա՝ գումար չունենք։ Ավելի ծիծաղելի է դառնում, երբ համեմատում ես խրախճանքների վրա համայնքի միլիարդավոր դրամներով ծախսերի հետ»։

Հիշեցնենք՝ քարոզարշավի ժամանակ հերթական սուր բանավեճն էր տեղի ունեցել վարչապետի հետ։ Կինը մոտեցել էր Փաշինյանին և նրան մեղադրել «հայրենիքը գողանալու» և «մի ամբողջ սերունդ ոչնչացնելու» մեջ։ 

Զրույցը վերածվել էր բարձր տոնայնությամբ վիճաբանության։ Ավելի ուշ պարզվել էր, որ Փաշինյանին մոտեցած կինը մանկաբարձ-գինեկոլոգ Արփինե Սողոյանն է, որի հարազատ եղբայրը 44-օրյա պատերազմում անհետ կորած փոխգնդապետ բժիշկ Հրանտ Պապիկյանն է:

Ռոզա Վարդանյան