Հայկական մեդիայում տարածվում է պնդում, թե Իրաքում հակակոռուպցիոն խոշոր օպերացիայի շրջանակում խուզարկություն է իրականացվել խորհրդարանի պատգամավոր Հինդ ալ Աբբասիի տանը։ Ըստ թուրքական Haberler-ի՝ խուզարկության ընթացքում պատգամավորի տանը հայտնաբերվել է 57 մլն դոլար կանխիկ գումար և 27 կգ ոսկի։ Նույն հրապարակման համաձայն՝ իրավապահները, բացի գաղտնի թաքստոցներից, հայտնաբերել են նաև ամբողջությամբ ոսկուց պատրաստված ներքնազգեստ։
Factor TV-ն ստուգել է այս պնդումները և պարզել, որ դրանցից ոչ բոլորն են հաստատվում։
Միջազգային հեղինակավոր լրատվամիջոցներից AP-ն և Al Jazeera-ն, հղում անելով Իրաքի պետական Iraqi News Agency գործակալությանը, հայտնել են, որ Իրաքում կոռուպցիոն մեղադրանքներով ձերբակալվել են տասնյակ քաղաքական պաշտոնյաներ։ Ըստ այդ հրապարակումների՝ ձերբակալությունները կապված են նախորդ ամիս կալանավորված նավթի նախկին փոխնախարար Ադնան ալ-Ջումեյլիի ցուցմունքների հետ։
Այս լրատվամիջոցները հայտնում են որ կոռուպցիոն գործի շրջանակում ընդհանուր առմամբ ձերբակալվել է 47 մարդ։ Հրապարակվել է 15 ձերբակալվածի անուն, որոնց թվում են 12 գործող պատգամավոր, մեկ նախկին պատգամավոր, նախկին վարչապետ Մոհամեդ Շիա ալ-Սուդանիի նախկին խորհրդականը, ինչպես նաև` Նավթի նախարարության մեկ այլ բարձրաստիճան պաշտոնյա։
Ձերբակալվածների ցանկում կա նաև Հինդ ալ Աբբասիի անունը, սակայն նրա տանը 57 մլն դոլար կանխիկ գումար, 27 կգ ոսկի և ամբողջությամբ ոսկուց պատրաստված ներքնազգեստ հայտնաբերելու մասին պնդումը պաշտոնական կամ վստահելի աղբյուրներով չի հաստատվում։ Այս դետալները չեն հանդիպում AP-ի, Al Jazeera-ի, Al-Monitor-ի, ինչպես նաև Իրաքի պետական գործակալությանը հղվող արաբական աղբյուրների հրապարակումներում։
Իսկ ներքնազգեստի շրջանառվող նկարը դեռ այս տարվա հունվարի 7-ին հրապարակվել է X-ում և բոլորովին այլ կոնտեքստում։ Բացի այդ, Hive Moderation գործիքը, որ հայտնաբերում է պատկերների՝ արհեստական բանականությամբ գեներացված լինելը, գնահատում է, որ լուսանկարի՝ AI-ի օգնությամբ ստեղծված լինելու հավանականությունը կազմում է 99,2%։
Այսպիսով՝ Իրաքում հակակոռուպցիոն գործողության և ձերբակալվածների մասին տեղեկությունները հաստատվում են։ Սակայն պատգամավորի տանը 57 մլն դոլար, 27 կգ ոսկու մասին տեղեկությունները չեն հաստատվում, իսկ ոսկուց պատրաստված ներքնազգեստի լուսանկարը գեներացված է արհեստական բանականության օգնությամբ։
Մարիա Խաչատրյան
